Shillong, Naiwieng 03
Ka Hynñiewtrep Integrated Territorial Organi-sation (HITO) ha ka 03 tarik u Naiwieng, 2026 hapoh ka jingïalam u Bah Donbok Dkhar, President, ka la leit ïakynduh ïa u Director ka Directorate of Mineral Resources ka Sorkar Jylla, u Bah M.B Tongper, ban ïakren halor ka jinglilam ïa u dewïong, uba don haduh
1 lak 21 hajar 288 metric ton, ba la ïoh kurup ha East Jaiñtia Hills District.
Haba kren sha ki lad pathai khubor u Bah Donbok Dkhar, President u la ong, ba ka don ka jingbym bud ïa ki kyndon ba la pruid dak ka Ïing Kashari, ban pynïaid ïa ka jinglilam dewïong ha ka rukom kaba shai bad kaba khuid.
Kumta dei ban pynsangeh shuwa ïa ka jingpyntip ban lilam kaba la pynmih da ka ophis u Deputy Commissioner ka East Jaiñtia Hills, myn ha ka 21 tarik u Risaw, 2026, u la ong.
U Bah Donbok u la ong ba ïa ka Auction Notice, ym shym la pyntip paidbah bad bun kim tip bad kim ïoh shim bynta, da kaba kynnoh ruh ba lait tang ki briew kiba don ka jingïadei bad ka NPP, ba lehse ka don ka jingleh shiliang-khmat.
“Ka Ïing Kashari ka la dep ban pynsangeh shuwa halor kane ka kam. Ngi la kyrpad ruh ïa ka ba kadei ban khot da kawei ka tender. Lada ïoh biang da kito kiba la ïoh lypa ruh ngim sngewpher, hynrei ai ba kan long kumjuh ïa baroh,” la bynrap u Bah Donbok.
Shuh shuh u la ong ruh ba lada jin ba ka HITO kan nym mih shakhmat ban ujor halor kane ka kam, i kumba ka NPP ka thep beit da ki briew lajong. “Balei ngi ong kumne? namar ba ki 4 ngut kiba la paw kyrteng ha ka jingthep tender, katkum ka jingïoh jingtip, kidei kiba don jingïadei bad ka NPP bad kiba la dep ban ïakhun ilekshon ruh na ka party NPP,” ong u Bah Donbok.
Namarkata, u la ong ba ka seng kan don ryngkat beit bad u paidbah, uba lah ban ïakhun ne uba don kata ka pisa ban thep tender ha kino-kino ki kam.
