Nongstoiñ, Nailar 27
Ki paidbah jong ka thaiñ Maweit ha West Khasi Hills bad na kiwei kiwei ki jaka kiba ju im jakpoh da kaba tih bad khaïi dewïong, ki la pynpaw ïa ka jingmynjur ïa ka jingtih dewïong ha ka par jong ka Pyndengshshlang Coal Block.
Ïa kane la ïoh ban sakhi ha ka Sngi Ba-Ar ha kaba ki paidbah ki la ïa poi lang sha ka ‘Public Hearing’ ïa kaba la pynlong ha ka shnong Sdad Dkhar ha West Khasi Hills da ka Meghalaya State Pollution Control Board na ka bynta kawei ka projek tih dewïong kaba yn hap ban tih ïa une u marpoh khyndew da kaba pyndonkam da ka juk stad saïan (Scientific Mining) bad da ki kor ki bor ba la long trai da u Bah Shainingstar Khardewsaw kaba la tip kum ka Pyndengshshlang Coal Block ha ka jaka kaba heh 100 hectar.
Haba phai sha kane ka ‘Public Hearing’ ym shym la don mano mano ruh ba pyrshah ïa kane ka jingthmu ban tih dewïong kaba yn sa pyntrei da ki kor ki bor.
Shuh shuh ha kane ka sngi la ïoh ruh ïa ka jingbatai ba bniah halor kane ka projek. La batai bad pynshai da ka kynhun jong ki Consultant kiba la ong ba kane ka rukom tih dewïong kan nym ktah ïa ka mariang. Ki la ai jingpynshai ruh halor ki kyndon ba ki trai par ki dei ban bud ryntih.
Ha kane ka ‘Public Hearing’, ki la don kumba 12 ngut kiba ai jingkren kynthup naduh ki nongïalam shnong, nongïalam kur, nongïalam seng na ka thaiñ Maweit bad West Khasi Hills kumjuh ruh ki nongkitkam jong ki Association kiba la pynsngew ïa kajuh ka phang ban ai ka jingkyrshan.
Ïa kane ka ‘Public Hearing’ ha Sdad Dkhar la pynïaid da u Bah MA Challam, ADC ka West Khasi Hills ha ka jingdonlang ruh u Member Secretary ka Meghalaya State Pollution Control Board u Dr GH Chyrmang, u Bah YF Laloo bad u Bah S Syiem, Environmental Engineer ka Meghalaya State Pollution Control Board bad kiwei kiwei.
U President ka KSU Porkhadoh Sdad Dkhar Area Unit u samla Westerbose Diengngan u la pynpaw da kaba ong ba la ïohi ïa ki jingeh ba ki paidbah ha kane ka shnong bad ha kiwei pat ki bynta jong ka jylla ki mad naduh ba ka NGT ka la khang tih dewïong ha u snem 2014, bad mynta la kot sha ka 10 snem kynthih.Hynrei u la ong ba da ka jingplie lad jong ka sorkar bad ka jingai ïa ka ‘Mining Lease’, kyrmen ba kan long ka jingkyrkhu na ka bynta ki paidbah, ïa ka shnong bad ka dong ka thaiñ.
“Ka seng kam don kano kano ka jingpyrshah ïa ki projek lane ka roi ka par kaba wan da ka jingshai halor ka aiñ bad ngi kyntu ba kane ka projek kam dei ban long ka jingïoh jingmyntoi shimet, hynrei ka dei ban long salonsar ba ki trai jaka ki trai shnong, ki samla jong ka dong ka thaiñ kin ïoh bynta lang ha ki kam ki jam, bad ngi na ka liang ka seng ngi ai jingkyrshan,” u la ong.
