Jowai, Nailar 27
Ka Land Port Authority Dawki, ka tnat Customs bad ki BSF ha ka 26 tarik Nailar ki la pynlong ïa ka jingkhynra ha Land Port Dawki ïa kawei ka bus na Bangladesh kaba ju wan kamai shi sien shi taïew na Dhaka sha Shillong.
Kane ka jingkhynra ka long hadien ka jingïoh jingtip kaba thikna ha kaba ka kynhun ka la lap ïa ki artylli ki bynta hapoh ka bus ba la pyndonkam ban buhrieh ïa shibun bah ki tiar ki tar kiba kynthup ïa ki jaiñ saree, mobile phone, tiar rupa, tiar Mobile, ki mashin ñiew pisa lem bad kiwei pat ki jait tiar.
Ka Superintendent ka tnat Customs ka Kong Clara Nongrum ka pyntip ba halor kane ka jingïoh kurup la kem noh ïa lai ngut ki nong Bangladesh na ka bynta ban pynlong shuh shuh ïa ka jingtohkit.
Katba ïa ki 28 ngut ki briew kiba don hapoh katei ka bus la pynbiang ei ïa ka bam ka dih lem bad kiwei pat ki jingdonkam da ki bor ba dei khmih jong ka Land Port bad ki nongshong shnong bad hadien la pynphai pat ïa ki lyngba ki jaka khappud ka India-Bangladesh.
Haba kren halor kane ka jingjia, u Manager ka Land Port Authority TC Chacko u la ong ba ki la ïoh ïa ka jingtip kaba bniah ba kane ka bus ka dei kaba la pynïaid da ka Shyamoli NR Travels na Dhaka sha Shillong bad Shillong sha Dhaka ka kit ïa shibun ki mar.
Halor kane ka jingïoh jingtip la pynlong ïa ka jingtalasi ha kaba la lap ïa ki artylli ki bynta ba la shna kyrpang, kawei hapoh jong ka ‘chassis’ bad kawei pat ha ka bynta ka khrum jong ka bus ha kaba la buhrieh ïa shibun bah ki mar ki mata.
Kine ki tiar ba la ïoh kurup ki kynthup ïa kumba 30 kilo ka rupa, 180 tylli ki Banarasi Saree bad 110 tylli ki Mobile bad kiwei pat.
Hadien ba la jurip bniah la aiti noh sha ka tnat Customs ban kurup noh ïa kine ki mar.
U Chacko u la bynrap ruh ba kine ki mar ba la ïoh kurup ki shongdor palat ïa ka T.50 lak, bad yn kem ïa kiba donkti katkum ki kyndon aiñ jong ka tnat Customs.
