Nongpoh, Nailar 27
Ka kynhun jong ki nongñiah Autorickshaw kamai ka thaiñ Nongpoh ba kynthup ïa hynriew tylli ki Unit, da ka jingbitar ha ka Sngi Ba-ar ki la lum jingïalang biang halor ka jingleh kuman jong u President bad nongïalam ka Nongpoh Region Auto Owners and Drivers Association (NRAODA) Sengkmie wat hadien ba ki la dep ban ai por 15 sngi ban pynshai bad pynlong ïa ka jingïalang paidbah bad ki nongñiah.
Kitei ki nongñiah auto kiba la mih shakhmat ha kane ka sngi ki kynthup na ka Nongpoh Unit, Saiden Unit, Pahamrioh Unit, Shangbangla Unit, Umsawnongkharai Unit bad Marngar Unit, da ka jingsngewkhia bad jingsngewbitar, ki la ïathuh ba mynta ki sah ha ka umdum halor ka jingtreikam jong u President ka Sengkmie, uba la ïoh thiah lyngngai bad jah klep khlem pynlong jingïalang bad ai ruh ïa ki jingkheiñ jingdiah.
Ki nongïalam ki la pyntip ruh ba hadien katei ka jingïoh thiah lyngngai, ki nongñiah ha ka 9 tarik Nailar, ki la dep ban ai da ka shithi sha u President ka NRAODA Sengkmie ban dawa pynlong noh ïa ka jingïalang hapdeng ki para nongñiah Auto bad ban ai jingkheiñ ruh ïa ka pisa kaba la lum na baroh ki kali Autorickshaw kamai ka thaiñ Nongpoh, kaba la khrong ha ka dor kaba T.10 kawei ka kali manla ka sngi.
Kitei ki nongïalam ki la ïathuh ba lada kheiñ duna eh ruh ki don haduh kumba 300 tylli ki kali kamai Autorickshaw ha kine ki hynriew tylli ki Unit kiba hap hapoh ka NRAODA Sengkmie bad lada kheiñ ka long kumba T.3 hajar shi sngi, bad ha ka shisnem ka la poi palat T.7 lak bad lada kheiñ pat ha kine ki 13 snem kynthih, ka jingkhrong pisa ka la long palat ïa T.1 klur.
Kaba la pynsngewbitar ïa kitei ki nongñiah ka dei ba ïa katei ka shithi kaba ki la phah, utei u nongïalam ka NRAODA Sengkmie, u la phah pynshai pynban mynno ki nongïalam ka Sengkmie ki la ïohthiah. Ki la pynshai ruh lada 13 tylli ki snem kam don satia ka jingïalang para nongñiah bad kam don satia ka jingai jingkheiñ jingdiah, hato kata kam dei ka jingïohthiah, bad kum ki nongñiah ki don ruh ïa ka hok ban tip shaei katei ka pisa kaba la lum ka leit sha ka pla jongno.
Halor kane ka bynta, ki nongñiah auto ki la ai por san sngi ïa u nongïalam ka NRAODA Sengkmie ba ki dei ban khot ïa ka jingïalang ha kano ka jaka kaba ki sngewbit ban pynshai bad ai ïa ka jingkheiñ jingdiah halor kane ka bynta bad ruh ban pynthymmai noh ïa ki nongkitkam na ka bynta ka bha ka miat jong ki para nongñiah kali kamai Autorickshaw ka thaiñ.
