Shillong, Nailar 27
Ka Sorkar Jylla kan sa ïakynduh shen ban ïakren halor ka jingpan por ka Harijan Pancha-yat Committee (HPC) haduh ka taïew ba khatduh u Nailur ban ai rai halor ka jingtyrwa pynkynriah ïa ki 342 tylli ki longïing na Them Metor, Them Ïewmawlong.
U Symbud Myntri Rangbah ka jylla, u Bah Prestone Tynsong, uba khmih ïa ka tnat Pohïing, u la ong, hadien ba la ïoh ïa ka shithi na ka HPC, ka sorkar kan sa shong ïa ka jingïalang mynta ka taïew ban shim ïa ka rai la kan mynjur ne em ïa ka jingpan por jong ka HPC.
Lah ban kdew ba hadien ka jingïalang hapdeng ka sorkar bad ka HPC kaba la long ha ka 10 tarik mynta u bnai, ka HPC ka la pan por haduh 15 sngi na ka Sorkar ban ïasyllok biang shwa paramaki hashwa ban ai rai. Hynrei hynnin ka sngi ka HPC ka la phah da ka shithi sha ka sorkar ban pan por shuh haduh ka taïew ba khatduh jong u Nailur, da kaba aidaw ba kim pat ïoh ban ïasyllok bad ki heh nongïalam na Amritsar bad Delhi.
Haba kylli halor ka rai jong ka Sorkar ba kan nym don shuh ka jingïakren hadien ka 15 sngi, u Bah Prestone u la ong, “Hooid, khlem pep ngi la leh ïa kata hynrei sa shisien ngi la ïoh pdiang ïa ka jingkyrpad na ka HPC ba ki dang donkam ïa ka por. Namarkata, nga ong ïa phi ba ngan nym ong eiei ïa mynta namar nga donkam ban khot ïa ka jingïalang ban shim rai.”
Dang shen, u Symbud Myntri Rangbah ba khmih ïa ka tnat Pynroi Sor, u Bah Sniawbhalang Dhar, u la ong ba lada ka HPC ka kyntait ïa ka saiñdur ne ‘blueprint’ ban pynkynriah ïa kitei ki longïing na Them Ïewmawlong, ka Sorkar kan nym don lynti da kawei pat lait na ka jingpynïaid shakhmat ïa ka mukotduma ha ïingbishar.
