Shillong, Nailar 28
Hapdeng ka jingïakynad hadien ba ka jingshah leh be-ijot bad shah pynïap jong kawei ka doktor ba dang 31 snem ka rta ha West Bengal, ka Myntri Rangbah, ka Mamata Banerjee, ha ka Sngi Balang ka la ai da ka jingmaham kaba tyngeh da kaba ong, “Lada phi thang ïa ka Bengal, kynmaw ba ka ding kan saphriang sha Assam, North East, Jharkhand, Odisha bad baroh ki jylla ha ka thaiñ mihngi kin shah ktah bad kin pluh.”
Ïa katei, ka Mamata ka la kren ha ka jingïalang ban rakhe ïa ka sngi ba seng ïa ka kynhun samla jong ka Trinamool Congress kaba ma ka, ka dei ka nongïalam bahalor duh.
Katei ka jingkren jong ka Mamata ka thew ruh sha u Myntri Rangbah-duh ka Ri, u Narendra Modi, ha kaba ka la kynnoh ba u la pyndonkam ïa ka BJP ban thaw jingkulmar ha Bengal. “Ka shuki Myntri Rangbahduh kan sa khih bad kan sa don hapdeng ka jingma. Ka shuki jong phi kan sa khih,” ka la ong.
Nalorkata, ka la ong ba ki aiñ jong ka Sorkar Pdeng ki tlot bad kim khlaiñ ban ai jingïada ïa ki kynthei. “Ngi kwah ba kiba leh be-ijot ïa ki kynthei kin shah pynïap,” ka la bynrap. Haba kynthoh kylla ïa ka Mamata, u Myntri Rangbah ka Assam, u Himanta Biswa Sarma, u la ong, “Didi, kumno phi nud ban byrngem ïa ka Assam? Wat pyni ïa ki khmat ba saw jong phi sha ngi. Wat pyrshang ruh ban thang ïa ka India. Kam ïahap ba phin kren da ki kyntien kiba wanrah ïa ka jingïapait.”
U Myntri Rangbah ka Manipur, u N Biren Singh, u la ong, “Kumno Didi phi nud ban byrngem ïa ka Northeast? Nga pynrem ïa kine ki jingkynthoh. Ka dei ban pan map sha ka Northeast bad ka Ri baroh kawei. Kam ïahap ba ka nongïalam kan pynmih da ki kyntien byrngem na ki rynsan paidbah.”
