Shillong, Nailar 28
Hadien katto sngi jong ka jingbym shai bad jingbym thikna, ki pulit ka East Jaiñtia Hills ha ka Sngi Balang ki la pyntip ba ha ka 26 tarik Nailar, ki la lap ïa kawei ka metïap kaba la pyut malu-mala bad ynda la peit na ka ‘Passport’ ba la don ha kane ka met, la shem ba ka dei jong u briew ba la tip kyrteng kum u Ishaque Ali Khan Panna.
U Panna u dei u juh u briew uba ki lad pathai khubor na Bangladesh ha kine ki khyndiat sngi ki la kam ba u la ïap ha Meghalaya hadien ba u la phet na la ka jong ka Ri ban wan sha India. Une u briew u dei u General Secretary barim ka Bangladesh Chhatra League (BCL) bad dkhot ka Pirojpur District Awami League (PDAL).
Ka Awami League ka dei ka seng jong ka Sheikh Hasina kaba la hap ban hair shuki kum ka Myntri Rangbahduh ka Bangladesh ha ka 5 tarik Nailar bad kaba la wan phet sha India.
“Ha ka janmiet 26 tarik Nailar, kawei ka metïap jong u shynrang ka bym lah ban ithuh satia kaba la sdang pyut la lap ba la thiah lyngktar ha kawei ka bri kwai kaba don ha thaiñ Dona Bhoi, East Jaiñtia Hills District, kaba don kumba 1.5 kilo mitar na khappud India-Bangladesh,” la ong ka kyrwoh na u Superintendent of Police (SP) ka East Jaiñtia Hills, u Giri Prasad.
Nalorkata, u la ong ba lap ruh ïa kawei ‘Passport’ Bangladesh kaba don ïa ka kyrteng Ishaque Ali Khan Panna na katei ka metïap.
Hadien kane, ynda la pyndep ïa baroh ki jingdonkam ha ka jaka ba la lap ïa ka metïap, la pynkynriah noh ïa ka met sha Civil Hospital, Khliehriat na ka bynta ban pyndep ïa ka ‘Post-Mortem’.
Shuh shuh u SP u la ong ba hadien ba la pyndep ïa ka ‘Post-Mortem’, la buh ïa ka met ha karma buh metïap (Morgue Room) ha Khliehriat Civil Hospital, East Jaiñtia Hills na bynta ka jingpynithuh bad ban wan kam ïa ka.
Ka jingtohkit halor kane ka dang ïaid shakhmat, la ong utei u heh pulit.
Ki lad pathai khubor na Bangladesh, ha kine ki khyndiat sngi ba la lah, ki la thoh ba u Panna u la khlad ha Meghalaya ha ka 24 tarik Nailar katba u dang pyrshang ban phet sha India na Bangladesh. Kitei ki lad pathai khubor ki la ong ba u pyrsa jong uwei na ki bahaïing u Panna, u Laikuzzaman Talukder Mintoo, Chairman ka Chirapara Par Satoria Union Parishad bad Organizing Secretary ka Kaukhali Upazila Awami League, u la kam ba u Kñi jong u (Panna), u la khlad noh hadien ba u la btuid na uwei u lum ha Shillong, Meghalaya, ha ka step 24 tarik Nailar ha kawei ka liang kaba la ïalam sha ka jingsangeh tied jong u klongsnam.
U Jasim Uddin Khan, kynum jong u hynmen u Panna u la ong ba u la ïakren bad u Panna lyngba ka ‘phone’ lai sngi hashuwa ka 24 tarik Nailar. U la kdew ba u Panna u la wanphai sha Dhaka ar sngi hadien ba u la sah ha ïing jong u, ha Shahid Fazlul Haque Road, ha Pirojpur ha ka 25 tarik Naitung.
U Jasim Uddin Khan u la ong ba ki la ïohsngew ba u Panna u la rung sha India lyngba ka khappud Tamabil ha Sylhet, ha kaba u la khlad noh.
Ka kotkhubor ‘Dhaka Tribune’ ka la ong ruh ba ka tyllong khubor ka ïathuh ba ha ka por ba pyrshang phet u Panna, la synran lang ïa u da u nongïalam ka Central Committee jong ka Awami League, uba na ka thaiñ Chittagong, bad u nongïalam ka Jhalakathi Chhatra League.
Lah ban kdew ba katkum ki lad pathai khubor na Bangladesh, u Panna u la shah jied kum u General Secretary ka Chhatra League ha ka Central Council jong u snem 1994. Hadien ka Council jong u snem 2012, u la long u dkhot ka Central Sub-Committee jong ka Awami League bad hadien, u dkhot jong ki Sub-Committee bapher-bapher. Haduh ba un da khlad noh, u la long u dkhot jong ka Pirojpur District Awami League.
Ha u snem 2008, u Panna u la ïoh pdiang ïa ka jingshah jied ha ka Awami League na Pirojpur-2 konstitwensi, hynrei u hap ban kynriah noh sharud namar ka ilekshon ïateh lok jong ka synrop ki 14 seng. Haba phai sha ki kam jong u, u Ishak Ali Khan Panna u la long u Chairman jong ka Diamond Life Insurance Company Limited.
