Shillong, Nailar 28
U Nongïalam ka TMC u Dr Mukul Sangma uba dei ruh u Myntri Rangbah barim ka Jylla ha ka Sngi Balang u la leit kam ban shimti ïa ka shuki Nongïalam ka Liang Pyrshah hapoh ka Ïingdorbar Thawaiñ ka Jylla da ka jingkyrshan jong u MLA ba marwei jong ka Congress u Bah Ronnie V Lyngdoh.
Haba kren sha ki lad pathai khubor, na ka liang jong u Lamphang ka Ïingdorbar, u Thomas A Sangma, u la ong, u Dr Mukul Sangma um shym la wan ban kam ha ka rai shimet ka jong u bad kam long kumta. U la ong ba dei ka TMC kaba la wan kam na ka bynta ka shuki Nongïalam ka Liang Pyrshah da ka jingkyrshan u MLA ba marwei ka Congress.
Kane ka jingleit kam jong ka TMC ban ïa ka shuki Nongïalam ka Liang Pyrshah ka la long ruh hadien ba u Bah Ronnie, ha ka sngi Ba-Ar, u la iehnoh ïa ka kam Nongïalam ka Liang Pyrshah bad ha kaba u la aiti ruh ïa ka shithi ba pynpaw ïa ka jingkyrshan jong u ïa ka TMC.
“Hooid, nga la ïoh pdiang ka shithi na ka TMC kaba la wan ban kam ïa ka shuki Nongïalam Liang Pyrshah hynrei ïa mynta nga dang bishar bad shen ngan sa ai ïa ka rai,” la ong u Lamphang.
Haba kylli hato kum ki MLA ka Liang Pyrshah, kata haba kheiñ lang tang ïa ki MLA ka TMC bad Congress ka la biang ïa ki ban kam ïa ka shuki Nongïalam ka Liang Pyrshah, u Lamphang u la ong ba kumba ka long, ki la lah ban pyndap ïa kata ka 10 persen na ka jingdon paid hapoh ka ïingdorbar kaba dei ban long katkum ki kyndon bad kam don jingeh shuh ha kane ka liang, hynrei ki don pat kiwei kiwei ki bynta ïa kiba dang donkam ban bishar bniah ha shwa ban ai ïa ka rai.
Ha kaba ïadei pat bad ka shuki Chief Whip ka Liang Pyrshah, kaba la thylli noh hadien ka jingiehnoh kam MLA jong u Saleng A Sangma, uba la jop ïa ka ilekshon MP, u Lamphang u la ong, “Katkum ka jingkam jong ka TMC, kaba don ïa ka jingkyrshan na u MLA ba marwei ka Congress, ki la kyrpad ba ïa ka shuki Nongïalam ka Liang Pyrshah ban ai sha ka TMC bad ka shuki Chief Whip ka liang pyrshah sha u Bah Ronnie.
U MLA ka Congress na Mylliem u la ong ba ka shuki jong u Nongïalam ka Liang Pyrshah ka long kaba donkam bad dei halor kane ba ka TMC bad Congress ki la rai ban pynthikna ba kane ka shuki kan nym sah thylli.
