Nongpoh, Nailar 28
Ha kawei ka jingjia kaba ishyrkhei ha ka mietSngi Balangkaba la jia ha ka por kumba 9 duna eiei, uwei u rangbah u la mynsaw jur na ki bynta jong ka kjat hadien ka jingshah ïuh ha kawei ka Bolero Pick-up.
Kane ka jingjia ka la jia ha ka surokbah National Highway-6, mar pyrshah bad ka shlem treikam jong ka Sericulture ha Mawdiangum jong ka thaiñ Nongpoh. Katkum ka khubor ba la ïohlum, la ong ba kane Bolero Pick-up kaba don ïa u nombor ML13-A-1479 ka la dep ban tynrah shwa bad sa ïuh pat na ka bynta ka kjat.
Ki briew kiba la sakhi ïa katei ka jingjia ki la ïathuh ba katei ka kali Bolero Pick-up kaba kit ïa ki jhur ki jhep bad kaba la pynher sted bha, ka la tynrah shwa ïa utei u rangbah ïa uba la tip kyrteng kum u Coldman Kharbithai na ka shnong Mawpdang katba u dang jam na shiliang sha shiliang sha ka surokbah.
La ïathuh ruh ba utei u rangbah, mar ïa shah tynrah, u la sied sha jngai bad katei ka kali kaba tynrah kala ïaid beit ban ïuh pat sa na ki bynta jong ka kjat utei u rangbah kat haduh ba ki shyieng ki shruh ki la pait bad pra syndon. Katei ka kali ka la phet krad noh na katei ka jaka.
Na ka liang ki briew kiba la ïohi ïa katei ka jingjia, mar mar ki la mih ban beh ïa katei ka kali, bad dei tang hadien khyndiat minit, ba ki la lap noh hajan ka thanad Nongpoh, hynrei u nongñiah u la phet krad na katei ka jaka bad ieh ïa ka kali hakhmat ka jaka ban rung sha thanad.
La sakhi ruh ba tang khyndiat minit, ki pulit ka thanad Nongpoh ki la wan poi ha katei ka jaka bad ïa utei u rangbah uba la mynsaw jur ruh, la pynkit noh mar mar sah Civil Hopsital Nongpoh na ka bynta ba un ïoh ïa ka jingsumar kaba kyrkieh. Halor kane ka jingjia, na ka liang ki pulit ki dang pynlong ïa ka jingtohkit bad ruh ban lapdien ïa utei u nongñiah uba la phet krad bad ieh ïa ka kali hakhmat jong ka thanad Nongpoh.
