Shillong, Nailar 28
U Symbud Myntri Rangbah ka jylla, uBah Prestone Tynsong, u la ong ba ka sorkar ka dang peit bniah ban pynkiew sha ka Civil Sub Division ïa ka Mawsynram C&RD Block.
Kane ka jubab u Bah Prestone ka dei ha ka kynta kylli jingkylli ha Ïingdorbar Thawaiñ ha ka Sngi Balang. U Bah Prestone u la jubab ïa ka jingkylli ba la wanrah da u MLA ka Mawsynram, u Bah Olan Suiñ. U Bah Olan u la buh jingkylli la ka sorkar ka don ne em ka jingpyrkhat ban pynkiew kyrdan noh ïa ka Mawsynram Block sha ka Civil Sub-Division kaba dei ka jingdawa jong ki paidbah kaba la slem bha hynrei u Bah Prestone u la jubab ba kane ka kam ka dang don ha ka jingpeit bniah da ka sorkar jylla.
U Bah Olan u la ïeng biang ban ong ba dang bun ki shnong ha Mawsynram Block ban ïa ka Ranikor bad Pynursla Civil Sub-Division, hynrei ka sorkar kam shym la peit ïa kane ka jingeh jong ki paidbah.
U la pynpaw ruh ba ki shnong kiba hap ha Mawsynram ki long kiba jngai lada shim naduh kiba sah ha khappud bad ka Bangladesh.
“Nga ïeng hangne na ka bynta ka sur jong ki paidbah ka Mawsynram namar kane ka jingdawa ka dei kaba la slem bha,” u la ong.
Na kaliang u MLA ka TMC na Nongthymmai u Bah Charles Pyngrope haba u laïeng ban buh jingkylli, u la ong, “Nga ruh nga ieng na bynta ka sur ki paidbah ka jylla.”
U la ong ba ka East Khasi Hills ka dei kaba heh bha hapoh ka jylla bad namarkata ka don ne em ka jingthmu naka sorkar jylla ban pynkha distrik thymmai ïa ka Sohra.
Na ka liang u Bah Prestone u la ong baka sorkar ka dang peit bniah ban kyntiew kyrdan ïa ka Mawsynram sha ka Civil Sub-Division bad ka Sohra sha ka District namar ka sorkar ka kwah ban wanrah ka jingïajan hapdeng ka sorkar bad ki paidbah.
