Shillong, Nailar 28
Ki nongrep synsar jong ka thaiñ Mawkynrew ki la pynpaw ïa ka jingsngew kmen namar ka dor u synsar mynta ka la kiew na ka T. 40 sha ka T. 50 shi kilo kaba long ka jingïarap ïa shibun ki nongshong shnong ka thaiñ kiba im da kaba rep synsar.
Haba kren sha ki lad pathai khubor ha ka Sngi Balang, u Bah B. Nongspung, uba dei u President ka Broomstick Association Mawkynrew, u la pynpaw ba ha kine ki sngi kiba la dep, u synsar ha ka thaiñ u la hiar dor shaba palat bad ka la ktah shikatdei eh ïa ki nongrep namar tang ka bai sngi bad ka bai bylla kam shym lah ïahap shuh bad ka dor ba la die ïa u synsar. Hynrei ka dei hadien ka jingshimkhia jong u MLA ka thaiñ, u Bah Banteidor Lyngdoh, uba la ïakynduh ïa u Myntri Rangbah ka Jylla, u Conrad K Sangma, ba mynta ka dor jong u synsar ka la kiew dor khyndiat. Na ka liang kitei ki nongrep ki la ïathuh ba ki da sngewïoh mynsiem bad phuhmut-phuhmat namar ka dor jong u synsar ka la kiew dor bad ki la kyntu ruh ïa ka sorkar ba kan dang kyntiew shaduh ka dor T.100 shi kilo ïa u synsar khnang ba ki paidbah kiba im lyngba ka kam rep synshar kin kiew ha ka ïoh ka kot.
“Kumba ka long mynta, watla u synsar u la kiew dor tang khyndiat bad kum ki nongrep ngi sngewïoh mynsiem hadien ba ngi la ïohi ïa ka jingshah shkor jong u nongmihkhmat. Hynrei haba ngi ïanujor pat, ngi dang duhnong ha ka jinglut jong ngi bad ka jingmih. Ngi la shu kheiñ antad ba lada kumno-kumno, ka dor jong u synsar kam dei ban duna ïa ka T. 100 ba kan wanrah ka jingïohnong lang ïa ngi,” la ong u Bah Nongspung.
Shuh shuh na ka liang kitei ki nongrep ka thaiñ ki la pynpaw ka jingsngewnguh ïa u Bah Banteidor lem bad ka Myntri kaba dei khmih ïa ka tnad ka rep ka riang, ka Dr. Mazel Ampareen Lyngdoh bad u Myntri Rangbah ka Jylla kiba la sngap ïa ki jingeh na ka bynta ka thaiñ Mawkynrew ban pynkiew dor biang ïa u synsar.
