Shillong, Nailar:
Ka Sorkar Jylla ka la ong ba ka kylla banyngkong jong ka New Shillong Water Supply Scheme (NSWSS) ka la ïoh ïa ka jingmynjur lyngba ka shithi ha ka 15 tarik Lber, 2024 ha ka jingmang kaba T. 538.44 klur hapoh jong ka State Plan.
Ïa kane la ïathuh da u Myntri ka tnad Public Health Engineering (PHE), u Marcuise N. Marak, ha ka Sngi Ba-ar haba jubab ïa ka ‘Call Attention’ jong u MLA ka VPP na Mawryngkneng, Bah Heavingstone Kharpran hapoh ïingdorbar halor ka khubor kaba la mih ha ‘U Nongsaiñ Hima’ – “Dawa ka HYC ban ai kam ïa ki kontraktor trai-ri na bynta ka NSWSS T. 1600 klur.”
U Myntri u la ong ba ka kylla banyngkong jong ka NSWSS ka la ïoh jingmynjur na ka bynta `538.44 klur hapoh jong ka State Plan bad ïa ka kam kontrak EPC la ai sha ka M/s BAC Infratech Private Limited ha ka 26 tarik Jylliew, 2024 bad ka projek ka don ha ki bynta ba sdang jong ka jingpyntrei.
Ha kajuh ka por, u la ong ba haba phai pat sha ka kylla ba-ar jong ka projek, ka jingpynlut kan long kumba T. 1,111.56 klur ïa kaba ym pat mang haduh mynta bad haba kheiñ kyllum lang, ka jinglut baroh na bynta ka NSWSS kan long kumba `1,600 klur.
U la ong ruh ba ka kylla banyngkong jong ka projek ka thmu ban tei ïa ka Dam, 2 tylli ki ‘Jack-Well’ bad ka ‘Pump House’, ka jingtei ïa ka Stage I bad II ‘Pumping System’, ‘Power Station’, ‘Pumping Main’, ‘Water Treatment Plant’, ‘Clear Water Sump’ nalor kiwei-kiwei.
U Myntri u la ong ba ïa ka projek baroh kawei yn khmih da ka SCADA/IoT ka ban tehlakam ïa baroh ki bynta ha ka jaka pdeng, ha kaba la pyntrei bad peitngor ïa baroh kawei ka rukom treikam.
“Kane ka rukom treikam ka long kaba donkam na ka bynta ka jingpyntrei hadien-habud bad ka jingpynbit pynbiang ïa ka skhim. Kane kan ïarap pynithuh mardor ïa ki jingbym biang, jingsniew, ka jingtuid um, jingdon ka um, jinglong-jingman ka um bad kiwei-kiwei bad kan long ruh ka jingmyntoi ban shim ïa kino-kino ki lad jingpynbeit kiba mardor,” la ong u Myntri.
U la ong ruh ba ïa ki bynta bapher-bapher hapoh ka kylla banyngkong jong ka projek ym lah ban phiah bad kam long hi ruh ban ai ïa ki kam sha ki kompani/kontraktor bapher-bapher da kaba buh jingmut ïa ka jingtbit bad jingshemphang kaba don bynta bad ka jinglong bniah jong ka kam ba kynthup ka jingpyndait ïa ka SCADA/IoT.
“Ka kompani kaba la shah bynshet kam ka dei ban lah bha, kaba don jingtip bad shemphang ha ka kam, ki bynta ba ïadei bad ka kor teknoliji, bad kaba don jingtip ïa ki projek heh ba kynthup ïa ka SCADA/IoT,” u la ong.
Shuh shuh ka kylla ba-ar jong ka projek kam pat ïoh ïa ka jingmang bad kane ka thmu ban siang ïa ka ‘Clear Water Pumping Main’, ‘Clear Water Gravity Main’, ka jingtei ïa ki ‘Clear Water Reservoir’ bad ka jingsiang ïa ka ‘Distribution System’ nalor kiwei-kiwei ki kam.
Na ka liang u Myntri, u la ong ba kam pat don kano-kano ka jingpyllait pisa haba ïadei bad kane ka bynta (haduh mynta) hynrei ka kam ka la ïaid shakhmat.
