Shillong, Nailar 28
U MLA ka NPP na Sohra, Bah Gavin M. Mylliem u la ong ba ka jingthut kaba na ka por sha ka por jong ka bording ha ki jaka nongkyndong bad khamtam ka jingsniew jong ki ‘Transformer’ ka la buh jingeh shi ka dei ïa ki paid nonghong shnong kiba shong ba sah ha ki jaka nongkyndong.
“Ka jingthut ba na ka por sha ka por ha ka bording khamtam ha ki jaka nongkyndong, ka jingsniew na ka por sha ka por jong ki ‘Transformer’, ki long katto-katne na ki jingeh kiba ki nongkyndong ki mad,” la ong u Bah Mylliem haba wanrah ïa ka ‘Call Attention’ hapoh Ïingdorbar Thawaiñ ha ka Sngi Balang.
Haba kdew ba kane ka jingeh ka la ktah ruh ïa ki kam khaïi bapher-bapher, u la kyrpad ïa ka Sorkar ban khmih bniah ha kane ka bynta.
“Ha kine ki khyndiat bnai ba la dep, tang hapoh konstiwensi jong nga, katto-katne ki ‘Transformer’ ki la sniew ha katto-katne ki shnong bad ki nongshong shnong kin hap ap da ki taïew bad teng-teng da ki bnai ban ïoh bujli,” u la ong.
Haba pynsngew ba ka jingduna nongtrei ka long ka jingeh kaba hakhmat eh jong ka MeECL ha ka kyrdan Sub-Division, u MLA u la ong ba ki jaka ki sah thylli namar ka jingkhlad noh ne ka jingshongthait jong ki nongtrei khamtam haba ïadei bad ka kam ‘Lineman’ (ha kine ki khyndiat snem ba la dep) ïa kaba ym pat lah pyndap da ka tnad MeECL.
U la ong ruh ba ki ‘Lineman’ kiba don lypa ki la bunkam shaba palat ha kaba uwei u briew un hap peit ïa bun tylli ki ‘Transformer’ nalor ba hap khmih ïa bun kilo-mitar ki ‘Transmission Line’.
Haba ai nuksa halor kane ka bynta, u Bah Mylliem u la ong, “Ka thaiñ Upper Sohra, uwei u ‘Lineman’ u peit ïa 22 tylli ki ‘Transformer’, katba ha ka thaiñ Laitryngew, uwei u ‘Lineman’ u peit ïa 17 tylli ki ‘Transformer’. Ha Khatar Shnong, uwei u ‘Lineman’ u peit ïa 14 tylli ki ‘Transformer’. Ha ka thaiñ Laitlyngkot, 2 ngut ki ‘Lineman’ ki peit ïa 36 tylli ki ‘Transformer’. Kumjuh ha ka thaiñ Mawjrong, 2 ngut ki ‘Lineman’ ki peit ïa 42 tylli ki ‘Transformer’ bad kumta ter-ter.”
Na ka liang u MLA ka Sohra u la ban jur ïa ka Sorkar bad MeECL halor ka jingdonkam ban buh hakhmat bad ym ban ïa peiñ ïa ki jaka treikam kiba la ñiew kum kiba kongsan.
Haba jubab halor katei ka bynta, u Myntri ka tnad bording, u Abu Taher Mondal u la kubur ïa kitei ki jingpynsngew u MLA naba ma u ïalade ruh u mihkhmat ïa ka konstitwensi na nongkyndong.
U la ong ruh ba ki mad ïa kajuh ka jingeh ha jan baroh kawei ka Jylla.
Ha kajuh ka por, la kular ba ka Sorkar kan sa shimkhia ban pynbiang bording sha baroh kawei ka Jylla.
Ha kawei ka liang, u la ong ba ka jingsniew ki ‘Transformer’ hapoh ka Jylla ka long 5.55% ha u snem 2022-23 – kaba kham bha haba ïanujor bad ka ri baroh kawei kaba long 5.81% ha u 2022-23.
U Myntri u la ong ruh ba ka kynta pynbiang bording na bynta ki jaka nongkyndong ha u snem 2023-24 ka long kumba 22.21 kynta pyrshah ïa ka kynta ba la buh thong kaba 21.5 kynta.
Katkum ka jingong jong u, ka kynta pynbiang bording na bynta ki jaka sor ha u 2023-24 ka long kumba 23.14 kynta pyrshah ïa ka kynta ba la buh thong kaba 22.75 kynta.
Shuh shuh u Mondal u la bynrap ba ka Interruption Index (Nos. of Interruptions/ Feeder Year) na bynta ki jaka nongkyndong jong u snem 2023-24 ka long kumba 578 katba ka National Average ka long 419.9.
Nalor kane, u la ong ba ka Interruption Index (Nes. of Interruptions Feeder Year) na bynta ki jaka sor jong u snem 2023-24 ka long kumba 337 katba ka National Average ka long 200.
