Shillong, Risaw 26
U Chief Electoral Officer (CEO) ka Jylla, u Dr. B.D.R. Tiwari ha ka Lah Sngi U Blei u la ong ba ka Meghalaya ka don 21,83,963 ngut ki nongthep ‘vote’ hadien jong ka Special Intensive Revision (SIR) 2026 – ka jinghiar da 1,65,682 ngut ki nongthep ‘vote’ na ka jingkheiñ ba hashuwa jong ka SIR kaba long 23,49,645 ngut.
U Dr. Tiwari u la ong ba ïa ki thup kyrteng bakhatduh ki nongthep ‘vote’ jong baroh 60 tylli ki konstitwensi ka Ïingdorbar Thawaiñ la pynmih ha ka 26 tarik u Risaw da kaba pynshong nongrim ïa ka 1 tarik u Risaw, 2026 kum ka tarik ba la buh, hadien ba la pyndep ïa ka jinglum thup, ka jingpynmih ïa ka ‘Draft’, ki jingkam bad ki jingpyrshah, ki notis bad ki ‘Hearing’.
Hashuwa ka SIR, ka Jylla ka don 11,58,740 ngut ki shynrang, 11,90,898 ngut ki kynthei bad 7 ngut ki ‘Third Gender’ kiba long ki nongthep ‘vote’ ha ryngkat ka ‘Gender Ratio’ kaba 1028 bad ka ‘EP Ratio’ ka long 651.
Ha ka jinglum thup naduh ka 30 tarik u Jylliew haduh ka 29 tarik u Naitung, ki BLO ki la leit sha man la ki ïing bad sam haduh 23,49,645 tylli ki phom, hynrei tang 21,69,243 tylli la lah ban lum biang noh. Kiwei pat ki 1,80,402 tylli ym shym la lah ban lum biang shuh bad la weng noh na ka ‘Draft Roll’ kaba la pynmih ha ka 5 tarik u Nailar – kynthup ïa 81,490 kiba la khlad noh, 45,011 kiba ‘absent’, 42,532 kiba la kynriah jaka, 6,701 ki ‘Duplicate’ bad 4,668 kiwei pat, u la ong.
Ka ‘Draft Roll’ ka don 21,69,243 ngut ki nongthep ‘vote’ – 10,53,039 ngut ki shynrang, 11,16,199 ngut ki kynthei bad 5 ngut ki ‘Third Gender’ – ha ryngkat ka ‘Gender Ratio’ kaba long 1060.
U Tiwari u la ong ba la pynmih haduh 6,51,735 tylli ki notis – 2,22,786 tylli na ka bynta ki nongthep ‘vote’ hapoh ka thup ‘Unmapped’ bad 4,28,949 tylli na ka bynta ki jingbym ïahap ne jingbym biang.
“Ki ‘Hearing’ ba la pynlong – 6,51,735 tylli, ki ‘Hearing’ ba la pyndep 100%, ki nongthep ‘vote’ ba la shah pyndam hadien ba la pyndep kam – 6,724,” u la ong.
Ki jingplie lad ba ïadei bad ki jingkam ne ‘Claims Window’ naduh ka 5 tarik u Nailar haduh ka 18 tarik u Nailur ka la sakhi ïa 21,694 tylli ki jingpynrung (Form 6/6A), 2,276 tylli ki jingpynkynriah, 2,526 tylli ki jingpyndam bad 12,860 tylli ki jingpynbeit ba la pdiang – kaba ïalam ïa ka jingkheiñ ba khatduh sha ka 21,83,963 – ka jingkiew kaba 14,720 ne 0.68% ha ka ‘Draft’.
Ka ‘Final Roll’ ka don 10,59,743 ngut ki shynrang, 11,24,216 ngut ki kynthei, 4 ngut ki ‘Third Gender’, 1061 ka ‘Gender Ratio’ bad 606 ka ‘EP Ratio’.
Na ka liang u Tiwari u la bthah ïa ki nongthep ‘vote’ ban pynshisha ïa ki kyrteng lyngba ka https://voters.eci.gov.in, https://ceomeghalaya.nic.in, ‘ECINET App’, bad lyngba ki ophis ki BLO ne ERO/AERO.
U la ong ba ïa ki jingujor pyrshah ïa ka hukum ERO lah ban ujor hakhmat u District Magistrate hapoh 15 sngi katkum ka ‘Section’ 24(a) bad ka jingujor kaba ar hakhmat u CEO hapoh 30 sngi katkum ka ‘Section’ 24(b).
U la pynbna ïa ki jaka pynrung kyrteng ba kyrpang ha kylleng ki distrik katkum ka jingbthah jong ka ECI ha ka 1 tarik u Risaw, 2026 na ka bynta ki nongthep ‘vote’ kiba don kyrteng ha ka thup kyrteng hashuwa jong ka SIR hynrei kiba jah pat mynta, ki nongshong shnong kiba dei hok ki bym shym la pynrung kyrteng, ki samla nongthep ‘vote’ ha ka sien banyngkong, ki ‘riew tymmen, ki PwD bad kiwei.
Na ka liang u Tiwari u la ai khublei ïa ki nongthep ‘vote’, ki seng saiñ pyrthei, ki BLA, ki Dorbar Shnong, ki Nokma, ki lad pathai khubor bad ki bor ba dei khmih ka tnad ilekshon ba kynthup ïa ki DEO, ERO, AERO, BLO Supervisor bad ki BLO kiba la pyndep ïa ka SIR.
