Jowai, Risaw 26
U Secretary ka North Eastern Council (NEC), u Satinder Kumar Bhalla ha ka 23 tarik Risaw u la leit jngoh ïa ka West Jaiñtia Hills District ban bishar bniah ïa ka jingïaid shakhmat ki kam kiba dang pyntrei hapoh ka project USP, kaba la tip kum ka Integrated Lakadong Turmeric Value Chain Enhancement Project.
La synran lang ïa u Secretary da u Dr. Sentitula, IFS, Director (Tourism & Industries), NEC; u Pranjal J. Dutta, Joint Managing Director, Meghalaya State Agricultural Marketing Board ka Sorkar Meghalaya bad ki ophisar na ki ophis jong ka District Horticulture Officer, District Agriculture Officer bad Meghalaya Basin Management Agency (MBMA).
Ha kane ka jingleit jngoh, u Secretary u la leit jurip ïa ka jaka ha ka shnong Thadmuthlong C Phramer, ka jaka ba la thmu ban tei ïa ka Centralised Processing Unit. Ka kynhun kaba pyntreikam ka la pyni ïa ka jingpynbeit ryntih bad jingpynkhreh ban tei ïa kane ka Cur-cumin Extraction Plant bad ka la ai ka jingbatai ïa u halor ki jingpynkhreh.
Ka kynhun ka la pyntip ruh sha u ba ki civil engineer bad ki riew shemphang ki dang trei ban pynkhreh ïa ka jingthmu bad halor ka jinglut jingsep, bad hadien yn sa sdang ïa ka jingkhot tender.
U Secretary u la ïoh ruh ban ïakren bad ki dkhot jong ka Lakadong Turmeric Cooperative Union Ltd., kaba long trai halor ka hok ban pynmih bad pynïaid ïew ïa u Shynrai Lakadong lyngba ka jingithuh katkum ka Geographical Indication (GI)-tagged. Ka Union ka la pynpaw ruh sha u halor ka jingïatreilang jong ka bad ka Department of Agriculture and Farmers’ Welfare ha kaba pyntreikam ïa kane ka project.
Ki dkhot ka Union ki la ïasam ruh ïa ki jingshem jong ki na ki jingleit sha Kandhamal, Bengaluru bad Hyderabad, ha kaba ki la ïoh shibun ki jingtip jingshemphang kiba ïadei bad ki kor teknoloji ha ka jingpynmih ïa u shynrai, ki kor ban sei ïa u Curcumin, ka jinglah ban pynïoh ïa ka dor kaba biang na ka bynta u shynrai Lakadong bad ban kyntiew ïa ka kamai kajih na ka bynta ki nongrep ha kylleng ka rilum Jaiñtia.
U Secretary u la leit jurip ruh ïa ka Lakadong Turmeric processing unit kaba la don lypa ïa kaba la pynïaid da ka Shangpung Farmers Union Collective Marketing Centre (CMC) ha Shangpung Pohshnong.
Ha ka jingïakren bad ki dkhot ka CMC kumjuh ki nongrep na ki shnong ba marjan, na ka liang ki nongrep ki la pynpaw ïa ki jingeh kiba ki ïakynduh ha kaba ïadei bad ka rukom rep ïa u shynrai, khamtam ka jingduna ban ïoh ïa ka sboh kaba biang, ha kaba ki la kyrpad ruh ïa ka jingïarap ban ïoh ïa ki masi ban pynbiang ïa ka jingdonkam ha ka liang ka sboh.
Halor kane, u Secretary u la pynshai ba kum kane ka jingïarap kam hap satia hapoh ka jingtreikam jong ka NEC da kaba ai jingmut ruh ïa ki nongrep ba kin wad ïa ki lad jingïarap kiba don lyngba ka National Dairy Development Board (NDDB).
Shibynta jong kane ka jingwan jngoh, u Secretary u la leit jurip ruh ïa ka Bio-curcumin Extraction Unit ba la pyntreikam da ka LIFE Spice Processing Cooperative Society Ltd. ha ka shnong Laskein. Kane ka Unit haduh mynta kam pat sdang ïa ka jingsei ïa ka Curcumin namar ka dang ap ïa ka jingïoh ïa ka ISO certification.
