Shillong, Risaw 26
Da kaba shim kum ka jingeh kaba shyrkhei tam ha ka histori jong ka United Democratic Party (UDP), u Nongïalam bad Symbud Myntri Rangbah barim Bah Bindo M Lanong u la ong ba ka UDP ka don hapdeng ka jakhom khait bad la tep ïa ka hapoh ka jingïalam jong u President Bah Metbah Lyngdoh, uba pynïaid ïa ka party thik kumba u pynïaid ïa ka kam shimet jong u (business).
Haba kylli halor ka jingphet noh ki 11 ngut na ki 12 ngut ki MLA ka UDP, u Bah Bindo u la ong, “Peit ka party ka don ha ka jingma mynta, ka party kam pat ju mad ïa kane ka jingeh. Kam pat ju mad ïa kum kane ka jingeh naduh u snem 1997 haduh mynta hynrei wat shwa kata ka HPU, APHLC 1971-72, kam pat ju mad ïa kane ka jait jingeh kumba ka long mynta bad baroh namar ka jingbym biang ki nongïalam,” u la ong.
Haba kyntait ban kynnoh ïa ki President jong ka party ha ka jinglong kyllum, u Bah Bindo u la ong, ha ka UDP, dei tang u President uba don ka jingkitkhlieh.
Shuh shuh u la ong, “Ban kynnoh ïa kano-kano ka party, ïa u President jong kano-kano ka party, la ka long ka UDP la ka long ïa kano-kano, ha ka jingshisha ym baroh kawei ka jinglong nongïalam jongno jongno hynrei ha kane ka khep, ka khep jong ka UDP, nga sngewsih ban ong ïa kane ba u President u sah marwei. Kumta, u hap ban ai jubab ïa phi, u dei u briew uba dei ban ïathuh ïa phi balei.”
“Da kaba wan sha ka UDP, u President ba mynta jong ka party, u la wan sha ka saiñpyrthei kham hadien namar, ha ka nongrim u dei u nongkhaïi da ka kam bad u la don ha ka kam khaïi pateng la slem bha,” ong u Bah Bindo.
“Ban don ha ka kam kum u nongkhaïi bad ban don ha ka saiñpyrthei kum u President jong ka party, kam long kaba suk. Nga pyrkhat ba kata ka dei ka daw balei ba um lah ban long uba shisha pura ban ai ïa ka por jong u baroh, ïa ka bor jong u baroh, ïa ka jingpyrkhat jong u baroh na ka bynta ka Jylla, na ka bynta ka Sorkar, na ka bynta ka jingsynshar,” ong u Bah Bindo.
“Ngam pat ju ïohi hok naduh ki snem 1970, 1971, 1972, kumta bun ki nongïalam ki la wan bad leit bad kiba bun na ki, ki dei ki nongïalam kiba shi sur shi dur, ha ka por ba ngi la ïoh ïa ka Jylla kiba bun na ki nongïalam kiba mynta kim shym la don wat ha ka saiñpyrthei. Nga kren shaphang ki nongïalam jong ka Jylla ha kito ki por, ki lah ban don ïa ka jingnang jingstad kaba biang, hynrei ki don ïa ka jingnang jingstad kaba biang bad kila ïakhun na ka bynta ka jingmyntoi jong ki briew. Kata ka long kaba kongsan bha, phi lah ban nym long kiba tbit, hynrei lada phi long kiba bha, lada ka jingmut jingpyrkhat jong phi ka long kaba hok na ka bynta ka jingbha jong ka Jylla, ka jingbha jong ki paidbah, nga pyrkhat ba kata ka long kaba kongsan bha ban ïa kaei kaba long mynta,” la bynrap biang u Bah Bindo.
Haba ïanujor ïa u Bah Metbah bad u President ba la khlad noh u Dr. Donkupar Roy, u la ong, “Hooid u Dr. Donkupar Roy u la long u briew uba bha, ym don jaka ban ïanujor hapdeng u Dr. Donkupar Roy bad u President ba mynta. Ka jingpyrkhat jong u (Dr. Donkupar), ka jingmut jong u ka long nga pyrkhat na ka bynta ka jingbha ym tang ka party hynrei na ka bynta ka jingmyntoi jong ka saiñpyrthei ha ka hok jong ki paidbah, kata ka hok jong ki paidbah, na ka bynta ka nongïalam ban pynïaid ïa ka party, ban pynïaid ïa ka Jylla, kane ka dei kaba ngi donkam kumta, ka UDP ruh ka donkam ïa u nongïalam uba bha.”
Halor ka jingkylli hato u Bah Metbah u dei ban hiar shuki kum u President ka party bad na ka shuki Myntri bad la ka UDP ka dei ban weng noh ïa ka jingkyrshan na ka Sorkar MDA, u Bah Bindo u la ong ba u Bah Metbah un nym hiar shuki hi dalade.
“U long na ka bynta ka jingsngewrit, tang ïalade, kumta un ym pynkhuslai mano ba wan bad mano ba leit katba u dang don. Un ym pyrkhat mano ba wan, mano ba leit katba ka ïadei bad ka jingsngewtynnad jong u, u ïaid da baroh ki jingdonkam jong ka jinglong nongkhaïi bad ka jingsngewrit. Ha ka kam khaïi, baroh ki leit na ka bynta mano ba riewspah, kumta namar kata un ym pyrkhat shaphang mano ba leit, mano ba wan, bad mano ba sah,” u la ong.
