Shillong, Nailar 28
U MLA ka Voice of the People Party (VPP) na North Shillong, u Bah Adelbert Nongrum, ha ka Sngi Balang u la dawa biang na ka Sorkar Jylla ba ka dei ban weng noh ïa ka khyrdop nar ba la pynïeng ha surok ban rung sha Ïew Mawlong.
U Bah Adelbert u la dawa ïa kane haba wanrah ka jingkylli bynrap ha Ïingdorbar Thawaiñ ha ka Dorbar Synrai kaba dang ïaid shakhmat mynta, ha kaba u la ong ba kane ka khyrdop nar kaba la pynïeng ban khang ïa ka surok ïaid kali ka dei ka bym don jingmut satia bad ka bym phoida eiei ruh.
Kane ka jingkylli bynrap ka la wan ruh hadien ba u Bah Adelbert ha kane ka sngi u la wanrah ïa ka jingkylli ha ka kynta kylli jingkylli ban tip halor ka jingthmu ban pynheh surok bad ka jingshna ïa ka jaka pynïeng kali kaba la tyrwa da ka sorkar ha ki ar tylli ki jaka, kata ha Nan Polok (Ward’s Lake) bad ka Phan Nonglait Park.
Une u MLA ka North Shillong u la buh jingkylli sha ka sorkar ba lano kan weng noh ïa kane ka khyrdop nar ka bym don jingmut eiei na surok ha Them Metor, kaba la long ka dawbah jong ka jingdheng kali bad khapngiah ha ka thaiñ Motphran bad Them Ïew Mawlong.
U Bah Adelbert u la pyntip hapoh ka Ïingdorbar ba u la dep ban ïakynduh ïa u Symbud Myntri Rangbah ka jylla u Bah Prestone Tynsong ha kine ki 7 ne 8 bnai mynshwa bad watla u la kular ban sa leh eiei hynrei kane ka kam dang sah hi kumjuh haduh mynta.
U long ba kam don jingmut satia ïa ka jingbuh ïa ka khyrdop nar bad kane ka paw ba ka sorkar kam dei ka nongweng jingeh hynrei ka dei ka nongwanrah jingeh, ka sorkar ka dei ban ai ka jingkular kaba biang ba kaei ka jingpyrkhat jong ka halor kane bad lano kan plie noh.
Haba jubab halor kane ka jingkylli bynrap, u Bah Prestone u la ong, ka sorkar ruh ka sngewkhia halor ka jingdheng kali ha ka thaiñ Motphran, bad dang shen ka la dep ban shong jingïalang bad kam long tang ïa ka sorkar marwei ban shu ong ban plie noh ïa kane ka surok hynrei donkam ïa ki jingtip kiba bniah namar kane ka bynta jong ka surok ka don jingïadei ruh bad ka jingktah ïa ka suk ka saiñ.
“Ngi la dep ban bthah ïa ka DC and SP bad nga sngew ba shen na ka liang jong ki, kin sa ai ïa ki jingtip kiba bniah ha kaba kum ka sorkar ruh ngi kwah ban plie noh kloi katba lah,” la ong u Bah Prestone.
