Shillong, Nailar 29
Ka Khun Hynñiewtrep National Awakening Movement (KHNAM) ka la phah da ka shithi sha u Lat ka Jylla, u C H. Vijayashankar ha kaba ïadei bad ka jingbym sngewhun ïa ka jingpynjlan ïa ka samoi treikam jong ka Khasi Hills Autonomous District Council (KHADC) bad ka Jaiñtia Hills Autonomous District Council (JHADC)
Ka seng lyngba ka shithi ka la pynpaw ïa ka jingbym sngewhun ïa ka jingpynjlan ïa ka samoi treikam jong ka KHADC bad JHADC haduh hynriew bnai da kaba pynpaw ïa ka daw jong ka jingpynbeit pud kaba dang ïaid shakhmat.
Ka seng ka la ong ba ka jingpynjlan ba hynriew bnai kan sa kut noh ha kine ki khyndiat sngi ban wan bad la ïoh jingtip ba ki kaiphod jong ki Delimitation Committee ha baroh ar tylli ki Council la mynjur da ki Ïingdorbar ka KHADC bad JHADC bad mynta ki dang don hapoh ka jingpeit bniah.
Shuh shuh ka seng ka la ong ba ka jingpynbeit pud jong ka Delimitation Committee ka la kut bad ïa ki kaiphod la ai sha ka sorkar bad namar ba la pyndep ïa ka jingpynbeit pud imat ym don daw shuh ban pynjlan shuh shuh ïa ka por jong ki Council.
Ka seng ka la kyrpad ïa u Lat ban pynthikna ba ym ailad ban pynjlan shuh ïa ka jingpynlong ïa ka ilekshon MDC.
