Shillong, Nailar 29
Ka sorkar Meghalaya ka la pynlut kumba T. 100 klur ha ki san snem ban thung ïa ki tynrai dieng ha kylleng.
Ïa kane la ïathuh da u Myntri Rangbah, u Conrad K Sangma, ha ka Sngi Palei haba jubab ïa ka jingkylli ba la wanrah da u MLA ka Mawryngkneng, u Bah Heavingstone Kharpran, ha Ïingdorbar Thawaiñ.
Na ka liang u Conrad u la ong ba ka jingthung ïa ki tynrai dieng ka la long ha ka jaka ba la kot sha ka 1.19 lak hectare.
Nalorkata, u Myntri Rangbah u la ong ba na ki tynrai dieng ba la thung, kiba im haduh mynta ki long 73,76,735 tylli ki tynrai, bad kane ka mut ba 75 na ka 100 lane 75% na ki tynrai dieng, ki la im. Hynrei u Conrad u la ong ba ka jingangnud jong ka sorkar ka long ba 100 na ka 100 ki tynrai dieng baroh ki dei ban im.
Shuh shuh u la ong ba ka sorkar ka dang pyrshang ban ïoh ïa ka jingïatreilang na ki shnong ki thaw bad ki paidbah khnang ban pynthikna ba ka jingthung ïa ki tynrai dieng kan long kaba jop. Ha kajuh ka por, u la ong ba ka sorkar ka thmu ban ai jingïarap ïa ki shnong ki thaw bad kiwei khnang ban lap ban pynim ïa ki tynrai dieng. U la ong ba ka don ruh ka jingpeit bniah kaba na ka por sha ka por ïa ki tynrai dieng ba la thung.
