Shillong, Nailar 29
Ka Meghalaya Awaken Concern Citizen (MACC) hapoh ka jingïalam jong u President u Bah Banshai Marbaniang ki la mih shakhmat ban pynpaw ïa ka jingeh kaba kum ki riew paidbah ki mad ha kaba ïadei bad ka jingkiewdor eh ki marbam mardih ha kine ki sngi kiba mynta.
Haba kren sha ki lad pathai khubor ha Shillong Press Club ha ka Sngi Palei, u President jong ka MACC u la ong ba hadien ka jingwad bniah bad ha ka jingïaid sharum shaneng ban jurip ïa ki ïew ki hat ha kylleng ki distrik kiba don hapoh ka Jylla Meghalaya ki la lap ba ka don ka jingkiewdor jong ki marbam-mardih ha ki dukan.
“Ynda ngi lah dep ban shim ïa ka rai, na ka liang jong ka kynhun ha ka 26 tarik Nailar, ngi la ïoh ban phah da ki shithi sha baroh ki 59 ngut ki MLA ka Jylla ,” u la ong.
U la ong ka seng ka la shong ruh ïa ka jingïalang ban ïa pyrkhat bad ki katto katne ngut ki ophisar kiba don hapoh ka ïingdorbar thawaiñ ka Jylla bad ki la ïoh ruh ban phah da ka shithi sha baroh ki 59 ngut ki MLA ka Jylla, ki 2 ngut ki MP ka Jylla, ka ophis ka Director General of Police (DGP) ka Jylla, ka Meghalaya State Consumer Dispute Redressal Forum bad sha u Lat ha kaba ba ïadei bad kane ka mat.
U la ong ba ka jingdie madan ïa ki jhur ki jhep, ki doh bad ka dohkha la ka long ha Polo, Khyndailad bad kumjuh ruh ha Motphran ki la die ha la ki jong ki dor kaba ym long ryntih shuh. “Halor kane ka bynta, ngi la ïoh ruh ban kren bad u Syiem ka Hima Mylliem u ba dei ban peit ïa ka Ïew mynta ba kaei ka dawbah kaba kongsan kaba la pynlong ïa kiba bun ki paidbah mynta ha kylleng sawdong ngi ïohi ba ka jingdie madan ïa ki jhur, ki doh, ki dohkha ka la saphriang haduh ba ngim lah shuh ban pyrkhat ba balei kumne ka jia”, bynrap u bah Marbaniang.
Shuh shuh u bah Marbaniang u la ong ba katkum ka jingshem lyngba ka Consumer Protection Act, 2019, ka kren shai ba ka long beaiñ ban die tam ïa ka dor jong kano-kano ka marbam kaba ym don dor khamtam ïa ki jhur.
U Bah Marbaniang u la ong ba ka jingkiewdor jong ki marbam mardih ka long kum ka jingban beiñ bad ka jingñiew beiñ ïa ki paidbah khamtam ïa u duk u suk bad ong ba lada uno-uno u nongmihkhmat u kren ïa kane ka jingkiewdor jong ki marbam-mardih hapoh ka ïingdorbar thawaiñ, kan long ka jingkyrshan na ka bynta u paidbah babun khamtam ïa ki nongshong shnong ka Jylla namar kane ka jingkiewdor jong ki marbam ka la long shaba palat pud.
“Ka jingkylli kaba ngi hap ban buh ha kane ka por ka long ba shaei ka pisa ka leit bad mano ba pynkiewdor? Kaei ka khajna kaba na ka liang jong ka Sorkar ka hap ban shim?,” la buh jingkylli u bah Marbaniang.
Shuh shuh u Bah Marbaniang u la ong ba kiba bun ki dukan ha Ïew kiba die ha madan ïa ki jhur ki jhep bad ki doh ki dei ki trai Jylla bad ka dor kaba ki ju buh ïa kine ki marbam ka ïapher na kawei ka dukan sha kawei pat ka dukan, bad ynda la wad jingtip na kiwei ki Jylla baheh kiba wan pynpoi ïa ki marbam sha kane ka Jylla kum ka napoh ka Jylla Nagpur, Uttar Pradesh, Rajasthan bad ka West Bengal, la lap ba ka dor ka la wan tang kawei shapoh ka Jylla Meghalaya hynrei ynda ka la poi pat shapoh kane ka Jylla Meghalaya, ka dor ka la ïapher. U la kyrpad ïa kiba shong die jingdie ha madan kiba die ïa ki jhur ki jhep bad ki doh ba kin die ïa ki marbam da ka jingsngewthuh bad ban ym pynlong ïa ki paidbah kum ki mraw kiba hap ban thied khamtam ka jingpyrkhat ka dei na ka bynta u duk u suk.
