Shillong, Nailar 29
Ki MLA jong ka Voice of the People Party (VPP) ha ka Sngi Palei kila mih jyndat napoh ka Ïingdorbar Thawaiñ kum ka dak ban pyrshah ïa ka rai ban ailad ïa u Rakkam A Sangma uba dei u Myntri ka tnat Pule Puthi ba un ai ka jubab halor ka mat ïatai ‘Short Duration’.
La sakhi ba hadien ba la dep ban ïatai ïa ka mat halor ka jingthungkam nonghikai ha Dadenggre Sub-Division ba la wanrah da u MLA ka Nongkrem, u Bah Ardent M Basaïawmoit, bad tang mar syn pynbna u Symbud Lamphang u Timothy D Shira ban ailad ïa u Myntri ka tnat Pule Puthi ba un jubab ïa kane ka mat ïatai ba lyngkot, u Bah Ardent u la ïeng bad ban kyrpad lyngba u Symbud Lamphang ban bthah ïa u Myntri Rangbah lane uwei na ki ar ngut ki Symbud Myntri Rangbah ban jubab.
U Bah Ardent u la ong ïa u Symbud Lamphang “Ngan ym sngap ïa ka jubab na u Myntri ka tnat pule puthi naba ka kam ka long kaba ktah bha.” Mar kumta la ïeng sa u Symbud Myntri Rangbah u Bah Prestone Tynsong uba la kdew ïa ki kyndon ha kaba u la long ba u dkhot ka ïing haba kren um lah ban kren ne thew shimet ïa uno uno u dkhot bad ong ruh ba ki jingkynnoh ki long beit shimet bad kan bha ban weng noh ïa ki kyntien kiba kynthoh shimet na thup jong ka Ïingdorbar.
Hadien ba u Symbud Lamphang u la aibor ïa u Myntri ka tnat pule puthi ban jubab, u Bah Ardent lem bad ki laingut kiwei pat ki MLA ka VPP kila ïeng na ki jaka shong bad mih noh shabar ryngkat ka jingpyrta “khlem ka raiñ ka rem, khlem ka raiñ ka rem”.
Haba kren pat sha ki lad pathai khubor, u Bah Ardent u la ong, naduh ba sdang kren, ngam kwah ban ïadon bynta ha ka jingïakren bad u briew uba don ka jingsngewpher jaitbynriew, uba don jingthmu ban wanrah jingïapher jingïashun hapdeng ki Khasi bad Garo ha ka jingkren paidbah ha ka ilekshon. “Nga sngewnguh ba u paidbah Garo u khlem pdiang,” u la ong.
“Naduh ba sdang la kren ba kwah ba u Myntri Rangbah lane uwei na ki ar ngut ki Symbud Myntri Rangbah ban kin jubab ïa ka jingïatai namar ngim lah ban ïapeiñ ïa ka nongrim ba ngi la ïeng. Ngim kwah ban kren bad u briew bad ha ka jingshisha um dei shuh ban bat ïa ka shuki Myntri lada dei ba u Myntri Rangbah u sngewthuh ba kane ka jingkren ka long palat pud,” la ong u Bah Ardent.
U Bah Ardent u la ong ba u Lamphang u lah ban pynkylla ïa ki kyndon, ka rai ka dei ha u. Kam dei ka kam shimet kaba u kren, u kren ha ka kyrdan Myntri bad ha ka jingkren u khlem kren kum u riew shimet, u kren kum u nongïalam jong kawei ka seng saiñpyrthei, la ong u Bah Ardent haba kylli hato ka dei ka jingkren shimet.
Haba ïakren pat bad u Bah Prestone halor kane ka bynta, u la ong, “Kaei kaba phi leh hapoh ka Ïingdorbar, ka jingkyrpad jong nga sha baroh ki dkhot ka long ba ngi dei ban bud ïa ki kyndon ka Ïingdorbar. Naduh u snem 1972 ngi bud ryntih ïa ki kyndon.”
“Nga sngew ba kumno phi pyndonkam ïa ki kyntien hapoh ka Ïingdorbar, ki dei ban ïaid katkum ki kyndon. Kumno phi kren, phi pyndonkam ki kyntien, ka bym long hap ban weng noh. Ka jingkren shimet ïa uno uno u dkhot khlem da don ki sakhi satar ba biang ba ka Ïingbishar ba ka la rai pynrem ne ai ka rai, lah ban ong, ban shu wan kynnoh kumne kumtai kam long kaba biang,” la ong u Bah Prestone.
