Shillong, Nailar 29
U Symbud Myntri Rangbah ka jylla u Bah Prestone Tynsong uba khmih ruh ïa ka tnat Pohïingu la ong ba u dang ïoh jingtip mynta halor ka jingdon ka jingujor ejahar (FIR) pyrshah ïa u Myntri sorkar u Rakkam A Sangma.
“Dang mynta ka sngi hi nga dang tip ba la ujor ejahar. Ai ba ki pulit kin leh ïa kaba donkam namar shisien ba la ujor ejahar, ai ba ka jingtohkit ruh kan sdang bad ïaid shakhmat,” la ong u Bah Prestone haba kren sha ki lad pathai khubor ha ka Sngi Palei.
“Nga sngewban ïa kaba leh drama hapoh ka Ïingdorbar, kan long kaba bha ban wan ïakynduh ïa ka sorkar ne ïa nga (Prestone), namar ïa kum kine ki ejahar, ngin nym lah ban ong ïa u IO ne ïa ki thanad ba wat nym register, naba kin hap ban ïaid katkum ki aiñ,” u la ong.
U Bah Prestone u la ong, “Ngan nym lah ban ong ba tang ba nga dei u Myntri ba khmih ïa ka tnat Pohïing ka mut ba ngan lah ban leh katba mon, kam dei kumta, hynrei ka jingmut pat ka long kumta namar kaei kaba ngi leh ka long namar ba phi dei na liang pyrshah, VPP, kaei kaba phi leh, lada ka jingujor ka long kaba dei, balei hi ngin tuklar bad kum kane ka jingmut kam dei ban don.”
U la ong ba donkam ban ïatreilang bad ki tnat sorkar, lada dei mano mano ha kano kano ka kyrdan bad yn nym lah hi ban leh tam, khamtam kane ka dei ka juk ba la shai.
Ha kawei pat ka liang, u President ka VPP u Bah Ardent M Basaïawmoit, uba dei u MLA ka Nongkrem u la ong, lada ka sorkar ka ai bor kylluid ïa ki pulit, kane ka jingleh jong u Rakkam A Sangma, la dei ban shah kem, namar ka kyndon ka la kren shai ba ym lah ban wanrah ïa ka jingsngewïapher ne pynïakynad jaitbynriew.
U Bah Ardent u la ong, “Ngim kwah ban long kum ha Manipur, hynrei hangne ngi shongsuk, kumta lada dei ba u dei u riew paidbah ne nongïalam seng, katta u la shah kem naduh mynno hynrei u dei u Myntri.
“Ngam shym la shu kynnoh, hynrei nga la dep ban pynshisha na ki paralok Garo halor ka jingkren wanrah jingsngew ïapher jaitbynriew bad ki la ong ba ka long kaba shisha bad kaba sngewsih bad ba ka jingkren ka la long palat.” U la bynrap ba ha ka jingshisha u la dei ban pynshai lane ban pan map hynrei u khlem leh kumta.
Haba kylli hato ka aiñ ka long tang ïa u rit u ria, u Bah Ardent u la ong, “Hapoh ka jingsynshar ka sorkar MDA, la ïohi ïa ka jingbat ïa ki kali tah ïit ïong jong ki riew paidbah, katba ïa ki kali jong ki nongkyrshan ka NPP kiba dei tang ki nongkyrshan kiba tah ïit ïong, ñiah khlem number plate, pynpah siren ym leh eiei, katba ïa ka kali jong nga ha Mawlai ki bat ba shong bun briew, ïa ka kali ba ïaid hakhmat jong nga kaba tah ïit ïong kim bat. Te phi la dei ban sngewthuh hangta.”
