Shillong, Nailar 29
U MLA ka TMC na Nongthymmai Konstitwensi u Bah Charles Pyngrope u la ong ba shiteng na ki Myntri ka Sorkar Meghalaya Democratic Alliance (MDA) ki dei kiba sah hapoh ka konstitwensi ka jong u, bad kumta u la kyrpad ïa ka sorkar ban mang pisa T. 5 klur ban pynbha ïa ki surok syngkien hapoh ka konstitwensi.
Ïa kane u Bah Charles u la kren hapoh ka Ïingdorbar Thawaiñ ha ka Sngi Palei ha kaba u la ong ba jan mar shiteng na ki Myntri ka Sorkar MDA bad wat ki MLA ruh ki dei kiba shong ba sah hapoh ka Nongthymmai Konstitwensi, kaba la wanrah ka jingïarkhie ruh hapoh ka Ïingdorbar.
U Bah Charles u la pyntip ba watla jan mar shiteng ki Myntri ki dei kiba sah hapoh ka Nongthymmai Konstitwensi, hynrei haba phai pat sha ki surok ki long kiba sniew bad kiba dap da ki thliew ki syar, lait noh tang ka surok na ïingsah jong u Symbud Myntri Rangbah, u Bah Prestone Tynsong, ban leit sha ka ïing jong u (Bah Charles).
U Bah Charles u la ong, hapoh Nongthymmai Konstitwensi ki ïing ki Myntri ki long naduh ka ïingsah jong u Symbud Myntri Rangbah ba khmih ïa ka tnat PWD u Bah Prestone Tynsong, u Symbud Myntri Rangbah ka tnat Pynroi Sor, u Bah Sniawbhalang Dhar, u Myntri ka tnat Animal Husbandry & Veterinary Bah AL Hek, u Myntri ka Food Civil Supply Bah Comingone Ymbon, Myntri ka tnat PHE Marcuise N Marak nalor kiwei pat ki MLA.
Haba pynpaw ba ka thup kyrteng ka dei kaba jrong, u Bah Charles u la ong, “Nga lah ban tip la u Symbud Myntri Rangbah ba khmih ïa ka tnat PWD un mang T.5 klur ban shna pynbha ïa ki surok ha Nongthymmai Konstitwensi”.
Haba jubab, u Bah Prestone u la ai khublei ïa u Bah Charles halor ka jingshim kyrteng ïa uwei pa uwei bad ong ha u snem ban wan, yn ïoh ïa baroh ki 60 ngut ki MLA ki ban sah ha Nongthymmai Konstitwensi.
U Bah Prestone u la ong ba ka jingthmu jong ka Sorkar Jylla bad ka tnat haba ïadei bad ka nongbah Shillong, ka long ban pynthikna ba baroh ki surok ba saw aïom, ki dei ban long kiba bha.
“Ha ka jingshisha, nga la dep bthah ïa ki engineer ba kin leit ban kheiñ ban diah haba ïadei bad ka jingpynbha ïa ki surok ka Shillong bad ban pynkhreh ïa ka mang tyngka bad hadien ba kila wanrah, ngin sa shimkhia bad pynïoh ïa ka mang pisa bad ban sa pyntrei bad maramot ïa ki surok,” la ong u Bah Prestone.
