Shillong Nailar 29
U Myntri Rangbah barim ka Jylla, uba dei u MLA ka Songsak konstitwensi, u Dr Mukul Sangma u la ïoh biang ban bat ïa ka kyrdan kum u nongïalam ka Liang Pyrshah ha kane ka Ïingdorbar Thawaiñ kaba khatwei jong ka Jylla hadien ba u Lamphang u la ai ka jingithuh ïa ka All India Trinamool Congress (AITC) kum ka seng Liang Pyrshah kaba kham hakhmat.
Kane ka jingai jingithuh jong u Lamphang ka Ïingdorbar Thawaiñ ka la wan ruh hadien ba u MLA ka Congress u Bah Ronnie V Lyngdoh u la sah marwei, bad u la pyllait noh ïa ka kyrdan kum u nongïalam ka Liang Pyrshah.
Katkum ka jingpynbna kaba la pynmih ha ka 29 tarik u Nailar, 2024, na ka liang u Lamphang ka Ïingdorbar Thawaiñ, u Thomas A Sangma, u la ithuh ïa u Dr Mukul Sangma kum u nongïalam ka Liang Pyrshah katba u Bah Ronnie V Lyngdoh u MLA ka Congress uba mihkhmat ïa ka Mylliem konstitwensi, u ïoh ïa ka kyrdan nongbat shabuk ka Liang Pyrshah lane Opposition chief whip ha kane ka Ïingdorbar Thawaiñ kaba khatwei jong ka Jylla.
Ka jingithuh ïa u Dr Mukul Sangma kum u nongïalam ka Liang Pyrshah ka dei namarba ka Trinamool Congress kaba don 5 ngut ki MLA ka la ïoh ïa ka jingbiang briew lyngba ka jingsynrop lang ka Congress kaba don MLA sa tang marwei.
Katkum ka kyndon, ban ïoh bat ïa ka kyrdan nongïalam ka Liang Pyrshah ha Ïingdorbar Thawaiñ ka Jylla, donkam ban don 6 ngut ki MLA kiba dei tang na kawei ka seng lane lyngba ka kynhun kaba synrop lang.
Kumta ka TMC kaba don 5 ngut ki MLA bad ka Congress kaba don MLA sa tang marwei ki la synrop lang ban ïoh 6 ngut ki MLA.
Da ka jingkylla ha ka saiñ hima khamtam ba ka Congress ka la duh noh ïa ka kyrdan nongïalam ka Liang Pyrshah, ka Rilum Garo kan thaw ïa ka khana sahkynmaw namarba ki MLA na Rilum Garo ki ïoh ban bat ïa ki saw tylli ki kyrdan kiba kham hakhmat eh kiba kynthup ïa ka kyrdan Myntri Rangbah (Chief Minister), Lamphang ka Ïingdorbar Thawaiñ (Speaker), Symbud Lamphang (Dy Speaker), bad nongïalam ka Liang Pyrshah (Leader of Opposition).
