Shillong, Jylliew 26:
U MLA ka VPP na Mawlai Constituency u Bah Brightstarwell Marbaniang u la ong ba ka seng ka khmih lynti ba ka Meghalaya High Court kan pynmih ïa ka hukum hapoh shisngi ne arsngi halor ka No Objection Certificate kaba dang sahteng na ka bynta u kyrtong jong ka sha Shillong Lok Sabha Bye-Election u Dr. Batskhem Myrboh.
U Dr. Myrboh u dei u nonghikai ha North Eastern Hill University u donkam ïa ka NOC na katei ka skulbah ban ïoh ïakhun ilekshon.
Kane ka mat ka don mynta hakhmat ka High Court hadien ba la pynslem na ka NEHU.
“Ha ka jingshisha, phi tip ba ka kam ka don ha ka Meghalaya High Court bad nga tharai mynta ka shong ha ka Meghalaya High Court”, la ong u Bah Bright haba kren bad ki lad pathai khubor.
“Ha ka shisngi ne arsngi, ka Meghalaya High Court kan sa pynmih ïa ka hukum bad katkum kane mano-mano ba hap ban kohnguh ïa kata ka hukum ki hap ban leh.”
U la pynskhem ba katkum ki kyndon jong ka UGC, ym dei ban bat ïa ka NOC.
“Ngam ïohi ïa ka daw ba ha ka jingshisha lada phi ïaid katkum ka kyndon jong ka UGC, lada phi la pyndep shisnem ka jingshakri, lada don eiei na ki bor pynïaid kin pyntip sha u briew uba donkti, lada don eiei kaba sniew hynrei nangta lada ym don eiei la pynthikna bad shisien ba la pynthikna ka NEHU ka shu donkam ban ai NOC beit,” u la ong.
Kumban shu pynkynmaw ka VPP ka la jied ïa u Dr.Batskhem Myrboh kum u kyrtong jong ka hadien ba ka shuki ha Shillong Constituency ka la thylli namar ka jingkhlad noh u MP (L) Dr. Ricky AJ Syngkon ha ka 19 tarik u Rymphang 2026.
