Shillong, Jylliew 26
Uwei u khynnah ba dang 14 snem ka rta, ba la tip kyrteng u Franky Makdoh na ka Shnong Nongkya, Ri Bhoi District, u la jah na la ïing naduh ka step jong ka sngi Balang, ka 24 tarik u Jylliew 2026.
Haba ïakren bad u Nongsaiñ Hima ka kmie jong une u khynnah, ka Kong Iaidalin Makdoh ka la ïathuh ba u Franky u ju sah bad ka Mei-ieid jong u, namar kadei marjan bad ka ïingsah, bad naduh ka por 8 baje eiei mynstep, u la jah na la ïing khlem wan phai ïingshuh.
Ka la ïathuh, ba shuwa ba un jah na ïing u la wan ban kren ïa ka para kaba dangthiah ha ïing bad kumta hi u la jah noh na la ïing. Nalorkata ka la ong ruh ba ha katei ka step la don ba ïakynduh khatduh bad u Franky kaba ki la ïa shong kali lang bad haba kylli u la ïathuh ba u mut leit sha Umsning, hynrei khlem poi pyrkhat ba un jah syndon khlem wan phai ïing shuh.
“Ngi khlem mai khlem leh eiei ïa u khun bad ngim tip ba na kaei kadaw ba u Franky u jah syndon na ïing khlem wan ïing shuh,” la ong ka kmie.
Haba kylli, ka kmie ka la ong ba kam shym la don ka jingsuba sniew eiei halor ka jingjah jong u, hynrei kum ka kmie ka don jingsngewtieng namar ba ki briew kiba jah rngai haba la shem la shu lap beit tang ïa ka met bad kaba pynsngewsih ïa ki bahaïing hasem.
Ka kmie da ka jingsngewsih kthang bad ïam paid dohnud, ka la kyrpad ïa la u khun, u Franky ba un sngewbha ban wan phai noh sha la ïing ha ryngkat ka met kaba koit kaba khiah.
“Ngam lah ban bam ban dih ne ban trei ban ktah, wat ban peit ïa ki khun, kiba dangrit, namar nga kynmaw palat ïa phi Franky khun baieid, sngewbha wan phai noh bad i mei i pa ha ïingsah. Kaei ba phi kwah khun ngin ai ïaphi,” pynpaw jingsngewsih ka kmie.
Kumta ka kmie ka la pynpaw ïa ka jingsngewsih kthang, namar ba ha kine ki por ka ju ïai jia ka jingjah briew. Namarkata, ka la kyrpad ïa ki paidbah ba lada ki lap ne ïohi, kin sngewbha ban pyntip ha une u nombar 9366751181.
