Shillong, Jylliew 26
Ka Voice of the People Party (VPP) ryngkat ka Women’s Wings ha ka Sngi Thohdieng ka la leit ban aiti da ka jingthoh ïa u Myntri ka tnad pule puthi u Bah Lahkmen Rymbui ban pynpaw ïa ka jingsngewkhia halor ka jingpyntlot ka Sorkar ïa ka ‘Deficit Grant Aid System’ bad kiwei de ki mat kiba ktah ïa ka Higher Education ha ka Jylla.
U Bah Brightstarwell Marbaniang MLA Mawlai, haba kren sha ki nongthoh khubor u la ong ki nonghikai ha ki Deficit College ki ïoh ïa ka UGC Pay-Scale, hynrei kaba paw ha kine ki ar snem, haba ki la ïoh ïa ka ‘Appointment’ kam dei shuh ka UGC Sanction Post bad ka la kylla da kumwei pat, kumta kane kan ktah shibun ïa ka jingkiew jong ka pule puthi hapoh ka Jylla.
Nalor kata u la ong, kumba ka Sorkar ka ju kren ba ka pule puthi ka dei ka mat ba ka Sorkar ka buh hakhmat eh, ka Sorkar ka la dei ban kham pynbha shuh-shuh ïa ka jingtreikam ha ka kam hikai bad kawei na kata ka dei ba ki nonghikai ki ïoh ïa ka UGC Pay-Scale, u la ong ba ka Sorkar mynta ka la sdang ban pynduh noh ïa kane.
“Ïa kane ka UGC Pay-Scale la sdang pyntreikam ïa ka naduh u snem 1975, ka jingthmu jong ka ka long ban khring ïa ki nonghikai kiba la tbit ha ka kam ban ai jinghikai” la ong u Bah Brightstarwell.
U la ong ba kane ka UGC Pay-Scale la 50 snem mynta ka khlem kylla, ki Sorkar ki leit ki wan hynrei ki khlem ktah ïa kane ban pynkylla namar ki sngewthuh ba ka long kawei na ka bynta jong ka jingkyntiew ban pynbha ïa ka pule puthi ha ka Jylla, katba ha ka Sorkar ba mynta ka pyrshang ban weng noh ïa kane bad u la pynpaw ba na ka liang ka party ka pyrshah jur ïa kane ka jingpyrshang jong ka Sorkar.
U Bah Brightstarwell u la ïathuh ruh ba na ka liang u Myntri Sorkar ruh u la pynpaw ïa ka jingsngewkhia haba ïadei ka pule puthi bad ban pynbha ïa ka pule puthi ha ka Jylla, hynrei u la kynthoh ba ka party ka la ïoh bun bha ki jingpynsngew na ki nonghikai bad ki skul, ba don ki nonghikai kiba la shongthait ar lai snem, hynrei ka Sorkar ka sngap jar bad ka khlem pat thung nonghikai ha ki post kiba la long thylli.
