Shillong, Jylliew 26
U Bah Sanbor Shullai Myntri ka tnad Animal Husbandry Veterinary ha ka sngi Thohdieng, u la kren shai ba ka Sorkar kan ym pyndam ïa ka Tender ba la pynmih haba ïadei ka projek ban pyntrei ïa ka State Veterinary Hospital ha Upper Shillong, watla ka la don ka jingdawa jong ka Meghalaya Contractor Supplier Association ban pyndam ïa ka.
Haba kren sha ki nongthoh khubor u Bah Sanbor u la ïathuh ba ka All Meghalaya Contrac-tor Supplier Association ka la aiti da ka jingthoh ha u bad kyrpad ban pyndam noh ïa ka tender jong katei ka projek, ha kaba u la pynpaw ba na ka liang jong u, um lah satia ban ai kano-kano ka jingkular. Hynrei u la kyntu ïa kiba la bit la biang ki jingdonkam ba kin ïashim bynta ha ka ban thep tender khnang ba kin lah ban ïoh ban pyntrei ïa kane ka projek.
“Ban pyndam ne ym pyndam, ngan ym lah ban ong eiei, namar ïa kane ka tender la dep ban pyllait paidbah” u la ong bad ban jur ba baroh ki kontraktor kiba lah ban pyntrei ïa ka projek, ki dei ban ïathep tender bad ka rai kan shong ha ka Tender Committee.
U Bah Sanbor u la ïathuh ba ïa kane ka projek la khot tender mynta la kumba shi bnai bad ka tarik ba kan kut kan dei ha ka 5 tarik u Naitung bad ïathuh ba ïa kane ka projek la khot tender tang kawei bad ka dei ka projek kaba kot sha ka 60 klur.
Haba ïadei ka jingkynnoh ba ka jingkhot tender tang kawei ïa katei ka projek kaba heh ka dei ba kiba don ha ka bor ki la don ki briew lajong, u Bah Sanbor u la kyntait war bad pynksan da kaba ong ba da dei ba la don ki briew lajong ka tnad kan nym khot tender shuh.
