Shillong, Jylliew 26
Da kaba kynnoh ba ym shym la don jingtip shaphang ki nongïoh jingmyntoi watla ka don palat T.400 klur ha ka Meghalaya Environment Protection and Restoration Fund (MEPRF), ka Jaiñtia National Council (JNC) hynne ka sngi ka la kyntu ïa ka Sorkar ban leh sorjamin lane lum jingtip ïa ki longïing kiba shah ktah na ka jingtih dewïong bad ban ai noh mardor ïa ki jingïarap.
Ka JNC hapoh ka jingïalam u President, Bah Sambormi Lyngdoh ka la ïakynduh ïa u MLA ka Khliehriat Konstitwensi, u Bah Kyrmen Shylla uba dei ruh u Adviser jong ka tnad Mining and Geology ban aiti da ka dorkhas halor ka MEPRF.
Ïa ka mang tyngka (Fund) hapoh ka MEPRF la thaw hadien ba ka National Green Tribunal (NGT) ka la khang ban tih dewiong ha u snem 2014, ha kaba ki kyndon ki bthah ba dei ban buh kyrpang 10 percent na ka jingïoh lum khajna na ka shalan dewiong na ka bynta ban pynbha ïa ki jaka ba la shah pynjulor ha ka jingtih dewiong bad ban ïarap ïa ki longïing kiba shah ktah.
Ka JNC ka la ong, ba ki jubab RTI ki pynpaw ïa ki jingduna haba pynshai halor ka MEPRF.
“Ka jubab lyngba ka RTI ka ïathuh ba kum kine ki jingtip ‘ym don’ haba la buh jingkylli shaphang ka jingdon jong ki longïing kiba shah ktah kiba la ïoh jingïarap bad ki lad pynbha ïa ki par dewiong, ba la shim da ka tnad Mining and Geology” ong ka JNC.
“Ka jinghiar ka kamai kajih ha East Jaiñtia Hills bad ha kylleng ka Jylla Meghalaya hadien ka jingkhang tih dewiong, ka long kaba la tip lut baroh” ong u Bah Sambormi.
“Hynrei ka long kaba kongsan kumjuh ba ïa ki pisa ba la thaw kyrpang na ka bynta ban ïarap pat ïa ki briew kiba shah ktah dei ban pyndonkam katkum ba la thmu”.
U la bynrap ba ka jingthmu jong ka MEPRF ka kynthup ïa ka jingïada bad jingpynbha ïa ka mariang, hynrei ka jubab ba la ïoh na ka RTI ka pyni ba kam don ka jingkitkhlieh. “Lada don ka pisa hapoh ka MEPRF, ka dei ban poi sha ki nongïoh jingmyntoi kumba la thmu. Dei ban don ka jingshai bad ka jingkitkhlieh ha ka jingpyndonkam ïa ka pisa. Ngi kut jingmut ban wad bniah kumno la pyndonkam ïa kane ka pisa” u la ong.
Ka JNC ka la kdew ba u Chief Secretary dang shen u la kam ïa ka jingdon bad jingthmu jong ka mang tyngka ha ka jingïakynduh bad ka Association jong ki nongtih dewïong.
“Ïa kane ka kam ngin shim khia bha bad ngin rah ha khmat u Myntri ba dei peit ïa ka tnad Mining and Geology, ban leh ïa kaba donkam” u la pynthikna.
Ka JNC ka la ong ruh, ba kan dang ïai bteng ban pynbor ban ïada ïa ki paidbah kiba shah ktah, namar ka jingshah khang tih dewiong bad ban pyndonkam hok ïa ka MEPRF katkum ka jingthmu.
