Shillong, Nailar 29
U Myntri ka tnat ka Social Welfare u Bah Paul Lyngdoh u la kular hapoh ka Ïingdorbar Thawaiñ ba ka sorkar kan sa thung ïa ka Departmental Committee ban bishar bniah ïa ka jingtyrwa ban pynkylla ïa ka Constitution (Scheduled Tribes) Order, 1950 bad ban wanrah ïa ka kaiphod hapoh lai bnai.
Haba jubab ïa ka ‘Resolution’ kaba la wanrah da u MLA ka VPP na North Shillong u Bah Adelbert Nongrum ha ka Sngi Palei, u Bah Paul u la ong, ka tnat kan thung ïa ka Departmental Committee ban bishar bniah ïa kane ka kam bad ban wanrah ïa ka kaiphod kaba khatduh hadien lai bnai.
Kane ka resolution ba la wanrah da u Bah Adelbert ka kwah ban pynsngew ïa ka Sorkar Pdeng halor ka jingdonkam kaba kongsan ban pynkylla shuh shuh ïa ka Constitution (Scheduled Tribes) Order, 1950 khnang ban lah ban weng bad bujli ïa ka thup jong ki jaitbynriew riewlum ha ka part XI jong ka schedule kaba ïadei bad ka jylla Meghalaya, haba buh hakhmat ïa ka jingdon ki jaitbynriew bapher bapher hapoh ka Jylla.
Shuh shuh haba jubab, u Bah Paul u la pynthikna ba yn sa ïakren bad ki kynhun bapher bapher bad shim ïa ki jingai jingmut jong ki hashwa ban pyndep ïa ka kaiphod bad hadien kata, yn sa phah sha u Registrar General jong ka Ri India, ha kaba kan sa don ruh ka jingbuddien ïa kane ka kam.
Ka Part XI jong ka Constitution (Scheduled Tribes) Order, 1950 (Part III -Rules and Orders under the Constitution) ka dei ka thup jong ki jaitbynriew riewlum kiba la shah dep pynbna ha ka jylla Meghalaya kaba mynta ka don haduh 17 tylli ki jaitbynriew riewlum kiba la pynbna kum ki Scheduled Tribe.
U Bah Paul u la ong ba ha u Jylliew 1999, ka sorkar ka la mynjur ïa ki rukom rai ïa ki jingkam ban pynrung lang ne weng noh na ki thup jong ki Scheduled Tribe. Katkum kitei ki kyndon ba la mynjur, tang kito ki jingkam kiba la dep ban mynjur da ka Sorkar Jylla, u Registrar General of India bad ka National Commission for Scheduled Castes & Scheduled Tribes kin hap ban shim ha kaban ai jingmynjur.
U Myntri u la ong, haba ïoh pdiang ïa kano kano ka jingthoh hapoh ka Ministry of Tribal Affairs ban pynrung ïa kano kano ka jaitbynriew ha ka thup Scheduled Tribe jong ki Jylla/UT, ka Ministry ka sa phah ïa kata ka jingthoh sha ki bor ka Sorkar Jylla/UT ban ai jingmut katkum ka Article 342 jong ka Riti Synshar ka Ri.
