Shillong Nailar 30
U MLA ka Mawsynram u Bah Ollan Sing Suiñ u la dawa pyntreikam bha ïa ka aiñ ban pynneh ïa ki khlaw kiba ïada ïa ki tyllong um ha kaba u Myntri Rangbah, u Conrad K Sangma, u la pyntip ba ki don haduh 7,000 tylli ki tyllong um kiba don ha ka jingma ban rngad noh syndon lada ym shim ki lad ki lad ki lynti ban sumar ïa ki.
Haba jubab ïa ka jingkylli u Bah Suiñ ha Ïingdorbar Thawaiñ ha ka kynta kylli jingkylli ha ka Sngi Thohdieng, u Myntri Rangbah, Conrad K Sangma, u la ong ba ka jingpynkylla ïa ka Meghalaya Protection of Catchment Area Act, 1990 kan sa don ha kaba yn sa don shwa ka jingïakynduh lang kito kiba dei ki nongdonbynta khamtam ki trai jaka namar khlem ka jingdonlang jong ki trai jaka ym lah ban pynkylla ‘catchment area ‘ ïa kano kano ka jaka.
U Conrad u la ong ba ïa ka Meghalaya Protection of Catchment Area Act, 1990 ym shym la lah ban pyntreikam thikna namarba lada ym mynjur lang ki trai jaka ka long kaba eh haduh katta katta ban pynkylla ïa kino kino ki jaka kum ki catchment area lada ym ïoh ïa ka jingmynjur da ka jingthoh na ki trai jaka ha baroh ki jaka ba la ithuh ban pynbna kum ki Catchment Area.
U Conrad u la kyrpad ïa ki MLA baroh ba donkam ban ïatreilang bad ka long ruh ka khubor sha ki trai jaka ban ïatreilang na ka bynta ka jingmyntoi jong ka mynta bad ka lawei ka pateng ban wan ban pynneh pynsah ïa ki tyllong um bad ki jaka khlaw kiba don hajan ki tyllong um.
U Myntri Rangbah u la ïathuh ruh ba ka Sorkar ka la dep ban ithuh palat 7,000 tylli ki tyllong um kiba don ha ka jingma ban duh noh ha kaba na kine, 750 tylli ki don ha ka jinglong kaba ma bha mynta.
Kumta u la ong ba kan sa don ka jingpynkhreh lyngba ka tnad Soil & Water Conservation da kaba ïatreilang bad ka tnad PHE ban pynneh pynsah bad ïada khnang ban pynim biang ïa ki tyllong um ha ryngkat ka jingpyndonkam ïa ki kor ki bor ka juk stad mynta.
U Bah Suiñ u la kyntu ïa ka sorkar ba ka dei ban sumar ia baroh ki catchment area namar ba bun ki la ring tyrkhong bad rngad lut bad wat ki tyllong um na ka bynta ka skhim JJM ruh ki don ha ka jingma.
U MLA ka UDP na Mawkyrwat u Bah Renikton Lyngdoh Tongkhar, u la kyntu ïa ka sorkar ban pynkylla ïa ka aiñ da kaba bthah ïa ki Hima ne Dorbar Shnong ba kin pynbna ïa kano kano ka jaka kum ki Catchment Area bad kan suk ruh ïa ka sorkar ban leh ïa kaba donkam.
