Shillong Nailar 30
U nongïalam ka Liang Pyrshah u Dr Mukul Sangma u la ong ba ka jingkynnoh ba ka NPP ka pyndonkam da ka pisa kaba ïohlum na ki kam be-aiñ kum ka jingkhaïi drok na ka bynta ban khring ïa ki MLA ka Congress ka long kaba khia bha bad lada ka Sorkar Jylla kam leh ei ei hap ban thoh wat sha u Myntri Rangbahduh (PM) ka Ri ban phah tuklar.
U la ong ba kito kiba shah kynnoh ki hap ban pynshisha ba ki jingkynnoh ki long kiba bakla bad ka dei ka jingkitkhlieh jong ki ban sait khuid namar ka jingkynnoh kum ka jingpyndonkam ïa ka pisa ba ïoh na ka jingkhaïi drok ka long kaba khia bha.
“Ka Sorkar India ruh ka hap ban shimkhia ïa kane ka jingkynnoh kaba khia bad nga hap ban thoh wat sha u PM ban shimkhia ïa kane ka jingkynnoh,” la ong u Dr Mukul.
U la ong ba kiba shah kynnoh ki hap ban pynshisha bad sait khuid ïa ka jingkynnoh kaba la wan na u President ka Meghalaya Pradesh Congress Committee (MPCC) u Bah Vincent H Pala.
Dang shen u Bah Pala u la kynthoh ba ka NPP ka pyndonkam da ka pisa ban thied ïa ki MLA ka Congress kaba shu ïohlum na ki kam be-aiñ kynthup ka pisa be-aiñ kaba ïohlum na ka jingkhaïi drok.
Haba kylli halor ka jingong u nongïalam ka NPP ban pynduh pyndam syndon ïa ka Congress ha Meghalaya, u Dr Mukul u la ong ba ia kano kano ka seng saiñ pyrthei ban punduh pyndam ka long kaba suk ban kren ban ïa kaba leh.
“Hynrei kam long kaba dei ïa nga ban kren ïa kano kano ka seng saiñ pyrthei ban shah pynduh pyndam noh. Kane ka shong ha ka mon ki paidbah ban rai,” u la ong.
