Shillong Nailar 30
U Nongïalam ka Liang Pyrshah u Dr Mukul Sangma u la ai ksai ba ka lah ban jia kaei kaei ha ka saiñ hima hapoh ka National People’s Party (NPP) bad u la kubur ba ka jingshah rong ki MLA kiba dei na kawei ka seng sha kawei pat ka dei ka jingtynjuh kaba ju jia, bad ka long kaba eh bha ban tehlakam.
U Dr Mukul uba dei ruh u nongïalam ka TMC ha Meghalaya u la pynpaw ïa kane haba jubab ïa ka jingkylli la ka TMC kaba don 5 ngut ki MLA ka mad ne em ïa ka jingtynjuh kumba ka la jia ïa ka Congress kaba la duh noh 3 ngut ki MLA kiba leit ïasoh bad ka NPP.
Dang ha ka 19 tarik Nailar, 2024, lai ngut ki MLA ka Congress, u Dr Celestine Lyngdoh, Gabriel Wahlang bad Charles Marngar ki la iehnoh ïa ka Congress, ka seng kiba ki la ïoh jingjop ha ka ilekshon MLA 2023, bad ki la leit long kawei noh bad ka NPP.
“Man la ka seng saiñpyrthei ka mad ïa kane ka jingtynjuh. Kane ka dei kaba kiba bun tylli ki seng saiñpyrthei ki ïakynduh kynthup ka NPP ha kaba shen phin sa ïohi ïa kaei kaei ka ban sa paw shabar,” la pynpaw u Dr Mukul, kaba long ka jingai ksai kaei kaei ka bym sngewtynnad ka lah ban jia ha ka saiñ hima hapoh NPP.
U Dr Mukul u la ong ba kam long kaba suk ban long kiba skhem bad ban lah ïeng ha ka saiñ hima sima namar “lada phi khlaiñ maphi bad ka kynhun, kin pyrshang bun ki buit kumno ban pyntlot ïa phi da kaba tan ïano ïano uba hajan eh jong phi.”
“Da kum kine ki jingleh ha ka saiñ hima kaba mynta kam long kaba suk ban tehlakam khamtam haba jur ka jingtynjuh,” la ong u Dr Mukul uba la bynrap ba kum kane ka jingtynjuh ym dei ba mad tang da kawei ka seng saiñpyrthei, hynrei bun kiwei ruh ki mad kynthup ka NPP.
U Dr Mukul uba long nongïalam ka TMC bad u MLA uba la rim tam eh ka Ïingdorbar Thawaiñ ka Jylla u la kdew ki jingjia kiba jia ha ka saiñ hima ha kaba ka NPP kaba don 26 ngut ki MLA ha u snem 2023 ka la shu kiew kynsan sha ka 28 ngut bad mynta ka la don 31 ngut ki MLA.
“Ki jingthoh ha ki kynroh ki paw shynna kumno ka NPP kaba bat ïa ka jingsynshar ka pynpoi haduh 31 ngut ki MLA. Kane ka pyni ba ka dei ka jingleh kaba long kutlad (desperate) namar ka don kaei re kaei hapoh,” la bynrap u Dr Mukul.
