Shillong, Nailar 30
Ïa ka met kaba sah jong u nongïalam ka seng saiñ-pyrthei Awami League, u Ishaque Ali Khan Panna, yn sa kit noh sha Bangladesh ha ka Sngi Saitjaiñ.
Ïa ka met jong u Panna yn rah na Khlieh-riat Civil Hospital sha khappud India-Bangla-desh ha ka por kumba 5 baje mynstep.
Lah ban kdew ba ïa ka met jong u Panna la lap na kawei ka bri kwai kaba don ha Dona Bhoi ha East Jaiñtia Hills ha ka 26 tarik Nailar. Kane ka jaka ka jngai kumba 1.5 km na u pud u sam jong ka India bad Bangladesh.
Katkum ka kaiphod ‘post-mortem’, la ong ba u Panna u la khlad hadien ba u la shah ksih.
Hadien ba lap ïa ka met jong u Panna, ka sorkar jylla ka la ïakren bad ka High Commission jong ka sorkar Bangla-desh, hadien ba la ïoh ïa ka jingbthah na ka tnat Korbar Ri bad Bar Ri jong ka Sorkar India, ban pynthikna ba ka met kaba sah jong utei u nongïalam ka Awami League kan poi beit sha Bangladesh.
Mynta ka sngi, uwei na ki bahaïing jong u Panna u la wan poi ha Meghalaya ban pyndap ïa ki kot ki sla hashwa ban shimti ïa ka met, bad ban rah sha ka ïing sah jong u Panna kaba don ha Pirojpur distrik jong ka Bangladesh.
Une u bahaïing jong u Panna u la ithuh ïa ka met kaba la buh ha Khliehriat Civil Hospital, bad ha ka jingshisha, la dei ban aiti noh mynne ka sngi hi, hynrei namar ka jingkhim jong ka por, la pynkynriah sha ka step Sngi Saitjaiñ.
Ki khubor kiba la ïohlum ki ïathuh ba ïa ka met kaba sah jong u Panna yn rah na Khliehriat sha Dawki Land Port da ka kali, bad nangne, ki shipai Border Security Force (BSF) bad Border Guard Bangladesh (BGB) kin ïatreilang ban pynthikna ba kan ym don jingthud ha ka jingaiti ïa ka met na India sha Bangladesh.
Lah ban kdew ba ki lad pathai khubor na Bangladesh ki dei ki banyngkong ban pynbna ba u Panna u la khlad ha Meghalaya hadien ba u la phet na Bangladesh. Hynrei na ka liang ki shipai BSF ki la kyntait ïa kane bad ki kam ruh ba u Panna u la shah siat ïap ne shah bom ïap ha u paidbhur ha Bangladesh.
Hynrei, ka jinglap ïa ka metïap kaba la sdang pyut jong u Panna na Dona Bhoi ha East Jaiñtia Hills ka la pynlyngngoh ïa kiba bun.
Ki khubor ki ïathuh ba katkum ka kaiphod jong ka ‘Post-Mortem’ ba la leh halor ka met jong u Panna ha Civil Hospital, Khliehriat, la shem ba u Panna u la khlad namar ka jingshah ksih.
U Symbud Myntri Rangbah ka jylla, u Bah Prestone Tynsong, u la ong ba ka lah ban long ba ïa ka metïap jong u Panna la wan bret shapoh u pud u sam jong ka India. Hynrei watla katta ruh, u la ong ba ka sorkar ka la bthah ba kan don ka jingtohkit kaba bniah halor kane ka jingjia.
“Ka tnat Korbar Ri bad Bar ri ki la leh ïa kaba donkam bad ka kamram jong ngi ka long tang ban shu aiti ïa ka met kaba sah sha ki bahaïing hasem jong uba la khlad,” la ong u Bah Tynsong.
Lah ban kdew ba u Panna u dei u General Secretary barim ka Bangladesh Chhatra League (BCL), kaba dei ka kynhun ki samla pule jong ka seng Awami League ba la ïalam da ka Sheikh Hasina, ka Myntri Rangbahduh barim ka Bangladesh kaba la hiar shuki ha ka 5 tarik Nailar bad kaba la wan phet sha India ha kajuh ka India.
