Shillong, Naitung 28
U Symbud Myntri Rang-bah ka Jylla Bah Sniawbhalang Dhar u la ong ba ka NPP ka dei ka seng saiñpyrthei kaba skhem bha ha Megha-laya bad ha kaba ym pat ju sakhi ïa kano-kano ka jingïaleh ne ïakynad hapoh na ka bynta ka bor ha kine ki 8 snem jong ka jingbat ïa u lakam synshar.
Haba kren ha ka jingïalang ïalap ilekshon na ka bynta u kyrtong ka NPP u Dr. DRL Nonglait ban ïakhun ïa ka ilekshon MP shiteng samoi na Shillong Lok Sabha ba la pynlong ha Umdihar, Umsning, Ri-Bhoi, u Bah Sniawbha-lang u la pynïapher ïa ka synshar khadar jong ka NPP bad ki Sorkar kiba la leit noh.
“La palat phra snem ngi la synshar ïa ka Meghalaya. Ngim ju ïashrut ne ïaknieh halor ka shuki Myntri Rang-bah, ngim ju ïaknieh ïa ka shuki Symbud Myntri Rangbah, ngim ju ïaknieh halor ka kam MP lane President namar ngi bunkam ban ïatrei ïa ki kam na ka bynta u paidbah ka Jylla,” u la ong.
“Kynmaw, ha ka por jong kiwei ki seng saiñpyrthei, ki Myntri Rangbah ki bujli man ka 7 bnai. Ba duna eh ka long ha man ka 2 snem. Mynta ngi la ïoh ïa ka Sorkar kaba skhem bha,” u la ong bad bynrap ba ka kam ba hakhmat eh jong ka NPP ka long ban trei ïa ka kam ym ban shu heh tyngam.
“Ka NPP ka dei ka seng ka bym don por ban shong bad ïathuh khana lorni ha ki ïew. Ngi bunkam ban trei, bunsien ban shong miet khnang ban lah pynbiang ïa ki jingdonkam u paidbah. Mano na ki nongïalam ka NPP ki don por ban jubab ïa ki nia kai?. Ngi jubab haba ngi sngew donkam ban jubab. Ngim dei ban pynlut ïa ka por ban jubab ïa kito ki bym don eiei ban leh,” u la ong.
U Bah Sniawbha u la pynpaw, “Ka jingim ka dei kaba lyngkot. Ngim don eiei pyrshah ïano-ïano ruh. Ka kam jong ngi ka long ban ieid iwei ïa iwei pat. Ngi don hangne ban pynbeit mar kylliang, ym ban khot ïa ki briew ki nongtuh. Lada ngi ki nongïalam ngi kren kumta ïa la ki jong ki briew, shano ka Jylla jong ngi kan poi?”.
U Bah Sniawbha u la batai ïa u Dr. DRL Nonglait kum u nongïalam uba sngewrit bad uba don ka jingshemphang, uba la “im ha ki shnong nongkyndong bad mad ïa ki jingeh” bad un nym klet satia ïa ki paidbah lada u shah jied kum u MP.
U la kyntu ïa ki nongthep vote ka Umdihar, Umsning bad ha baroh kawei ka Ri-Bhoi ba kin kyrshan ïa u kyrtong ka NPP, da kaba ong ba ka jingïatreilang hapdeng ki nongïalam ka Jylla bad ha Delhi ka long kaba kongsan ban wanrah ïa ka roi ka par.
“Lada u MP u don ha ka Liang Pyrshah, ngin sdang da kaba minus. Ngi donkam ïa ki briew na kajuh ka ïing, kajuh ka kynhun, ha Jylla bad ka Delhi, kumta ka roi ka par ruh kan wan,” ong u Bah Sniawbha.
