Shillong, Naitung 28
Ka Voice of the People Party (VPP) State Youth Wing ka la pynshai sha ki paidbah nongshong shnong ka Jylla ba na ka liang ka party kam sngewïahap ïa ka jingkren jong ka nongmihkhmat paidbah, kaba mihkhmat na ka Laitum-khrah Konstitwensi, da kaba ka ong ba ka VPP SYW ka shim kabu ïa ka jingïakhih ki samla pule ha Nongbah Delhi.
Ha ka kyrwoh ba la phah da u Bah Marbud Dkhar, President u la ong ba ki don ban ong ïa ka Kong Ampareen Lyng-doh, ba na ka liang ka VPP State Youth Wing, ka khlem shim kabu haba ïadei bad ka jingïakhih jong ki Samla pule, hynrei hadien ba ki la ïohi lyngba ki lad pathai khubor bad kumjuh ruh lyngba ki rynsan Social Media bapher-bapher halor ka jingleh donbor jong ki bor pulit bad ka jingbom naphang jong ki ïa ki riew paidbah khlem da kheiñ snep shuh ruh wat ïa ki riew kynthei, ba kin ktah kti ka pynlong pat ïa ki ba ki sngew ba kadei ka kamram jong ki pat ban leit sha Nongbah Delhi, ban aï ka jingkyrshan ïa kane ka jingïakhih, namar ki sngewthuh ba kane ka jinglait jong ki jingkylli ha kaba ïadei bad ka NEET EXAM, ha shuwa ka por exam ka ktah salonsar ïa baroh ki khynnah kiba pynkhreh ïa kane ka exam.
“Ngi lah ban sakhi ïa kane da ka jingdkhat jubor noh jong 21 ngut ki khynnah ïa la ka jingim, na ka daw ka jinglait tuh jong ki jingkylli. Ngi buh jingkylli ruh ïa ka Kong Ampareen, hato ki khynnah pule kylleng ka ri kiba kyrshan ïa kane ka jingïakhih, hato ma ki ruh ki shim kabu?,” ong u Bah Marbud ha ka kyrwoh.
U ong “Ngi kwah ruh ban tip ba ka NPP ka jah shano ha ka por ba kine ki khynnah ki shah bom shah tied ha ki pulit, balei kam kren eiei halor kane ka jingjia ha Nongbah Delhi, hato dei ba ki bunkam palat ne dei ba ki tieng ïa ka BJP ba ka pynlong pat ïa ki ban kbum jak wat tang ban ang shi kyntien ruh kim nud. Ngim sngew ïahap bad ngi pynrem jur ïa ka jingkren jong ka Kong Ampareen Lyngdoh, ha kaba ka la kynnoh ba shim kabu ka VPP SYW”.
“Namarkata, na ka liang ka VPP SYW, ka shu kwah ban pynkynmaw ïa ka Kong Ampareen Lyngdoh, ba kum ka jaidbynriew ngim pat klet ïa kaei kaba ka la leh ha ka por ba ka dang long ka Myntri kaba peit ïa ka tnad pule puthi jong ka Jylla. Hato ka jingleh jong ka Kong Ampareen, kam dei kaba shim kabu ban pyndonkam bakla ïa ka bor jong ka kum ka Myntri pule puthi ha kato ka por, ban pyndonkam sia lieh ha kawei na ki exam pynrung kam Nonghikai ?. Ki paidbah kim pat klet bad shisien ka sngi phin sa hap ban ai ka jubab.”
“Ngi kwah ban tip ruh naphi sa kawei, phi kylli ïa ka KHADC, ka leh aïu ïa ki nongrep ? Ka jingkylli kaba ngi kwah jingpynshai naphi pat ka long, ba aïu pat kum ka Myntri ka rep ka riang barim phi la leh na ka bynta jong ki nongrep ? Hato lada dei ba phi la trei hok bad thaw ki polisi ha ka por ba phi long Myntri, kine ki nongrep katta kin nym mad kum kane ka apot bad ka jingeh ? Mynta, ynda phi la ïaid tang kum ka MLA ktha bad bam kot, phi wad daw bad jlaw,” la ong u Bah Marbud.
Ka VPP SYW, kan ym kynran dien ban ïakhih lane ban kyrshan ïa kano-kano ka jingïakhih paidbah, haba ïadei bad ki mat jong ki Samla pule lane ki mat kiba ktah ïa ka hok jong ki samla wadkam ruh. Nangne shakhmat na ka liang ka VPP SYW kan pynkhlaiñ ïa ki jingleit khynra ïa ki tnad bapher-bapher jong ka Sorkar Jylla haba ïadei bad ki jingpynrung kam, namar ba ngi ïoh jingtip ba ka jingpynrung kam, kam long da ka lynti kaba khuid, hynrei la shu thung jubor tang ïa ki katto katne kiba don jingïadei bad ki heh Sorkar da kaba knieh noh pat ïa ka hok jong kiwei.
