Shillong, Naitung 28
Ka Sorkar Meghalaya ha ka Sngi Ba-ar ka la khmih bniah ïa ka jingsngewkhia jong ki paidbah halor ka mat ba ïadei bad ka projek ‘Shillong Peak Rope-way’, da kaba pynpaw ba kane ka projek ka la ïoh lut ïa baroh ki jingmynjur katkum ka aiñ bad la ïaid shakhmat da kaba pyrkhat lang kumno ban ïada ïa ka mariang bad ka imlang-sahlang.
Ha ka kyrwoh khubor, ka Meghalaya Rope-way Development Authority (MRDA) kaba hap hapoh ka tnad jngohkai pyrthei ka la ong ba ïa kane ka ‘Ropeway’ kaba kot T.151 klur la pyntrei kum shi bynta jong ka skhim ‘PM-DevINE’.
Ïa ka jingbei pisa la pynïasoh lang bad ka New Development Bank kaba synñiang T.80.89 klur, ha kaba ka tnad DoNER ka la ai T.70.11 klur.
Ka jingpyntrei ïa katei ka ‘Ropeway’ kaba jrong 896 mitar, ka ban don 13 tylli ki kamra ba la shna katkum ki kyndon CEN jong ka Europe, la buh ban sdang ha ka 15 tarik u Risaw, 2025.
Ki heh ophisar ki la ong ba kane ka projek ka thmu ban tyrwa sha ki nongjngohkai pyrthei ïa ka lad ka leit ka wan ba kaba kham bha, ha kajuh ka por, da kaba thaw ruh ïa ki lad ai kam ai jam bad pynduna ïa ka jingdheng kali, kumjuh, ka jingpynmih ïa ka tdem sha ‘Shillong Peak’. Shisien ba la dep lut nadong-shadong, la khmih lynti ba kan long kawei na ki ‘Ropeway’ kit nongleit-nongwan kaba paka tam ha ka ri katkum ka juk mynta.
Na ka liang ka MRDA, ka la kdew ba ïa kane ka projek la saiñdur da ka tnad jngohkai pyrthei ha ryngkat ka jingïatreilang bad ka Riat Laban Dorbar Pyllun, kaba la ai wai ïa ka jaka kaba heh 7,416.95 sqm (na ka bynta kane ka jingthmu) katkum ka jingïateh ba la ïasoi ha u Kyllalyngkot, 2023.
Haba phai sha ka bynta jong ka mariang, ka Sorkar ka la ong ba ka jingai jingbit haba ïadei bad ki khlaw ki btap na ka bynta ban kynriah ïa ka jaka kaba 2.3357 hektar la ai da ka tnad Environment, Forest & Climate Change jong ka Sorkar Pdeng ha ka 24 tarik Risaw, 2024.
Ïa ka jingsiew bai lutksan jaka na ka bynta ban thung dieng la leh ha u bnai Nailur, 2023, bad la bud ïa ka rukom treikam kaba ïadei katkum ka ‘Forest Rights Act’.
Ha kajuh ka por, la ïoh ïa ka jingbit ban pom ïa 544 tylli ki dieng hadien ba la buh dak ïa ki.
Ka kyrwoh ka bynrap ba la pynlong ruh ïa ki jingïamir jingmut bad ki paidbah ha u bnai Nailur, 2022 bad hadien kata, la pynlong ruh ïa ki jingïalang jong ki nongshim bynta.
Katkum ka jingpynbna EIA 2006, kane ka projek kam donkam ban ïoh ïa ka jingbit haba ïadei bad ka mariang.
Baroh ki NOC kiba ïadei bad ka jingïada la dep ban ïoh pdiang, kynthup na ka Airports Authority of India ha u bnai Ïaïong, 2023, ka tnad shipai suiñ ha u bnai Naitung, 2023, bad na ka tnad shipai ryngkew ha u bnai Nailar, 2023.
Ka Sorkar ka la ban biang ba ka roi ka par bad ka jingpynneh-pynsah mariang kan ïaid ryngkat-ryngkat.
Ka la ong ba ka jingïadon bynta bad ki nongshim bynta kan ïai bteng lyngba ka por jong ka projek, ha ryngkat ka jingïada ïa ki pateng mariang jong ka Meghalaya bad ka jingthaw ïa ki lad kamai kiba lah ban neh.
“Ka jingïada ïa ka pateng mariang jong ka Meghalaya, da kaba thaw ïa ki lad ki kabu kiba neh na ka bynta ki nongshong shnong jong ka, ha kawei ka liang, ka ïai long ka nongrim ba btin lynti ïa ka buit treikam ka Sorkar ban kyntiew ïa ki kam jngohkai pyrthei,” ong ka kyrwoh.
