Nongpoh, Naitung 28
Uwei u nongñiah ïa ka trok kaba kit ïa u maw clinker u la mynsaw hadien ba um lah shuh ban teh lakam ïa ka kali kaba u ñiah bad leit ban tynrah ïa kawei pat ka trok kaba dang thep umphniang bad tynrah ruh ïa ka kor thep umphniang haduh ba kala julor khait.
Kane ka dei kaba la jia ha 17 Mer Petrol Pump kaba don ha ki thaiñ Byrnihat ha ka step sngi Ba-ar katba katei ka trok kit maw clinker kaba don ïa u nombar AS01-UC-5013 ka dang rung sha katei ka jaka thep umphniang. La kynnoh ba katei ka trok ka don jingthut bad kumta u nongñiah um lah shuh ban teh lakam bad ngat ha kitei ki jingtyngkhuh.
Ha kane ka jingjia, u nongñiah katei ka trok kit maw clinker u la ngat ha ka jingmynsaw bad nyngkong la pynkit shwa sha Byrnihat PHC bad kham hadien la pynkynriah noh sha ARHI Hospital, Jorabad na ka bynta ban pynïoh ïa ka jingsumar kaba kham paka.
Na ka liang ki pulit ka thanad Byrnihat ki dang pynlong ïa ka jingtohkit halor kane ka jingjia bad ruh ban weng ïa katei ka trok na katei ka jaka thep umphniang.
