Shillong, Naitung 28
Ki bahaïing hasem jong u Bah Shanbor Rani ha ka 28 tarik u Naitung 2026, ki la leit ban ap sha NEIGRIHMS, hospital, katba dang leh ïa ka post mortem ïa u Bah Shan-bor, ban tip ïa ka daw ka jingïap jong u.
Ïa ka met jong u Bah Shanbor Rani, ki bor pulit ki la wanrah hynnin ka janmiet sha NEIGRIHMS ban pyndep ïa ka post mortem, hynrei namar ka jingbym don ki doktor la pyndep noh mynta ka sngi ïa ka post mortem.
Ka jingsdang ban leh ïa ka post mortem ka la ïaid naduh ka por 11 baje mynstep bad haduh janmiet la lah ban pyndep, ha kaba ki bahaïing hasem ki la shimti noh ïa ka met jong u Bah Shanbor Rani.
Ki bahaïing jong u Bah Shanbor ki la wan poi ha NEIGRIHMS ha ryngkat ka jingïam paid dohnud, halor ka jingshah pynïap kaba shyrkhei, kaba ula shah mait da ka wait haduh 12 sien na ki bynta jong u ryndang bad ka met ruh kumjuh.
Lah ban kdew ba u Bah Shanbor u la shah pynïap ha ka miet ka 26 tarik u Naitung 2026, ha kaba la lap ïa ka metïap jong u ha Mawkasiang, kaba la phlei snam haduh bym ithuh shuh ïa ka durkhmat, namar ba la shah mait da ka wait haduh 12 sien.
U Bah Shanbor u dei uba shong ba sah ha Nongmensong, Lumshyiap, uba la don 38 snem ka rta.
Haba ïadei bad kane ka jingjia, ki pulit ki dang pynlong ka jingtohkit, ban lap ïa ka daw halor ka jingshah pynïap.
Katkum ka jingïathuh ki pulit hynnin ka sngi, na ka jingphla kiba la lait im la ong, ba ki don 3 ngut kiba shah rahbor ha ki 6 ngut ki briew, ba kynthup ruh u Bah Shanbor, hynrei uwei u la lait phet, katba uwei pat u la mynsaw jur bad la kit ïa u sha jaka sumar katba ïa uba lait phet, la lap da ki shipai BSF kiba la kit ban phah sumar ïa u sha NEIGRIHMS.
