Shillong, Naitung 28
Ka surok kaba dkut harum Laitlyngkot ka la don mynta la shi bnai eiei bad kane ka surok ka dei kaba la pra ha ka 21 tarik u Jylliew 2026 hynrei haduh mynta ym pat shah ban phah ïaid ïa ki kali namar ka surok kam pat long shngaiñ namar ki kompani ki dang don hapdeng ka jingtrei .
La ïohi ba ki kali ki bym pat tip ki don kiba ïaid na kane ka surok hynrei ki don ki nongap hashwa ban
poi sha ka jaka ba pra ka surok kiba la bat noh ïa ki kali kiba ïaid ban phah ïaid noh na kawei pat ka lynti.
Haba ïakren bad uwei na ki nongkhang lynti ïa ki kali ba ïaid na katei ka surok, u la ïathuh ba mynta katei ka surok kaba dkut ka don hapdeng ka jingtrei na ka kompani bad ïa ki kali kiba leit bad ba wan khamtam kiba hiar sha Pynursla ym pat shah ban ïaid lyngba katei ka surok bad ki hap ban ïaid na ka surok kaba la bthah.
Kumta ki kali kiba leit sha Pynursla ki hap ban ïaid lyngba na ka surok shnong Iewmawiong, Umthli, Nongthymmai ka ban shim por kumba 15 kilomitre eiei ka jingjngai na kane ka shnong sha ka jaka tihmaw kaba dei ka jaka u Bah Khrikson Lyngkhoi bad sa poi sha surok bah ter ter sha Pynursla.
Ki nongbat kali kiba ap ha surok ki la ïathuh ba mynta kiba hiar sha Pynursla ki la bun kiba ïaid na kane ka surok bad ki la duna bha kiba ïaid na Sohra namar ka surok ka long kaba jngai.
U rangbah ba pynïaid kali na Nongthymmai – Laitkynsew u la ïathuh ba ïa kane ka surok ki plie beit baroh shisngi hynrei ïa ki kali ba heh kim shah ban ïaid namar ka surok ka long kaba rit lait noh ïa ki kali ba heh kiba la don da ka pass shah ban ïaid.
U la ïathuh ruh ba kane ka surok nalor ba ka long kaba rit ka long ruh kaba sniew bad ka shem jynjar haba ïakynduh kali na kata ka daw ki hap ban bat shwa ïa ki kali.
Shuh shuh ki la batai ba kiba bun ki kali kiba ïaid ki dei beit na thaiñ Pynursla bad ki nongshangkai pyrthei ruh ki la duna bha kiba wan.
