Shillong Nailar 30
U MLA ka Mawkyrwat u Bah Renikton Lyngdoh Tongkhar u la dawa ban pynkiew noh sha ka 100 ngut ha baroh ki District Institute of Education Training (DIET) na ka bynta ban leit pule kito kiba kwah ban long nonghikai.
U Bah Renikton u la pynsngew ïa kane ha Ïingdorbar Thawaiñ ha ka Sngi Thohdieng lyngba ka jingïakren kaba lyngkot kaba u la wanrah halor ka jingdonkam ban pynkiew na ka 50 ngut sha ka 100 ngut ïa kiba leit pule ha DIET Nongstoiñ na ka bynta ban long nonghikai.
U Bah Renikton u la ong ba ki don ki DIET kiba don tang 6 ngut ki nonghikai katba kiba pule pat ki don 100 ngut. U la ai nuksa ba ka DIET Nongstoiñ lei lei, kaba la don lypa 11 ngut ki nonghikai, ka la dei hok ban pynkiew na ka 50 ngut sha ka 100 ngut kiba pule.
U Bah Renikton u la ai jingmut ïa ka Sorkar ba baroh ki DIET kiba don tang 50 ngut kiba pule dei ban pynkiew lut sha ka 100 ngut kum ka DIET Nongpoh, Tura bad Baghmara.
Shuh shuh u la dawa ruh ba ki distrik kiba dang don tang ki Block Institute of Education and Training (BIET) kum ka South West Khasi Hills ha Mawkyrwat dei ban pynkylla pura noh sha ka DIET.
U la ong ba lada pynkiew sha ka 100 ngut ïa ka DIET Nongstoiñ kan long ka jingmyntoi ïa ki samla pule. U la ong ba ka BITE kaba dang tei ha Mawkyrwat dei ban pynkylla noh sha ka DIET.
Na ka liang u Myntri ka tnat pule puthi u Rakkam A Sangma u la ong ba ka Sorkar ka dang don ha ka bynta ban pyndep ïa ka BITE ha Mawkyrwat bad ïa kane yn pynkylla beit kum ka DIET.
U la ong ruh ba kiba shah hikai ha ki DIET kin ïoh beit ïa ka bai bam bad lada ka dang slem ba kim pat ïoh lehse ka dei ba don ki jingbymbiang hangne hangtai kiba donkam ban pynbeit.
U Rakkam u la kyntu ruh ïa kito kiba la long nonghikai ban pyndep hok ïa ka kamram kum ki nonghikai na ka bynta ka lawei jong ki khynnah namar ka jingbym pyndep ïa ka kamram ban leit hikai ka dei ka kam runar.
