Nongstoiñ, Nailar 30
Ka Hima Nongstoiñ Land Owners Coal Traders and Producers Association (HNLOCT&PA ) ka kyntu bad kyrpad ïa ka sorkar ba kan pynkloi noh ban pyndep ïa ki kot ki sla khnang ba ka kam tih dewïong katkum ka juk stad saïan kan ïoh ban sdang noh.
U Bah M. Mawlot, President ka seng, ha ka kyrwoh khubor ba la phah, u la pynpaw ba ka seng hi ka pynpaw ruh ïa jingsngewnguh ïa ka jingïatreilang ki sengbhalang jong ka dong bad ka thaiñ West Khasi Hills hi baroh kawei, ïa ka Kur Diengngan Porkhadoh-Sdaddkhar, ki Nongsynshar Shnong jong ka Area Maweit, ki ophisar jong ka Sorkar, ki bor pulit jong ka distrik, bad ki paidbah ki nongkhaïi, kiba la wan ai ka jingkyrshan ïa ka ‘Public Hearing’ ba la khot pynlong da ka Meghalaya State Pollution Control Board.
U la ong ruh ba ka seng ka ai khublei kyrpang ïa ka Sorkar Jylla kaba la pynurlong ïa kane ka jingpynsngew paidbah na ka bynta ban ïoh sdang noh ïa ka jingtih dewïong, wat hapdeng ka jingïaid lynti kaba la slem ban pynïoh pat ïa ki paidbah jong ka Jylla ïa kane ka jingtrei jingktah kaba la shah pynsangeh noh ha ka kashari NGT mynta la 10 snem.
U Bah Mawlot u la pynkynmaw ruh ba halor kam kam dewïong ka HNLOCT&PA ka la long kawei ka Seng kaba la ïakhun da ka mukotduma pyrshah ïa ka hukum khang tih dewïong jong ka NGT kaba 17.04.2014. kaba la long kum ka jingtied tyrnem kaba khraw eh ïa ka ïoh ka kot jong ka Jylla ha kato ka por bad haduh mynta ka dang neh sah.
Ka seng ka la ïakhun khlem shongthait, dei ha ka snem 2016 hadien ba ka NGT ka la kyntait ban bishar ïa ka dorkhast jong ka seng, ka seng lyngba ki nongsaid aiñ jong ka ka la leit ban tied jingkhang ha ka ïingbishar badonburom bad ba halor duh jong ka ri, ka Supreme Court.
Ka Seng lyngba ka dorkhast ïa kaba la tip kum ka Special Leave Petition ( SLP) ka la leit ban thep ha u bnai Jymmang jong ka snem 2016 bad ka ïingbishar ka la pdiang ban bishar ïa katei ka jingkyrpad jong ka.
U la ong ruh ba ka seng ka pynpaw ka jingsngewnguh ïa ka Sorkar MDA ba la ïalam da u Myntri Rangbah, Conrad K. Sangma kaba la shimkhia bad phah ïa ki nongsaid aiñ jong ka Sorkar ban leit thep ïa ka ‘Affidavit’ jong ka kum ka jingkyrshan ïa kane kam bad ka kam ka la seisoh, ha ka snem 2019 ka ïingbishar ka la ai ïa ka rai ban weng noh ïa ka hukum jong ka NGT bad ithuh syndon ïa ka rukom bat khyndew bat shyiap jong ka jaitbynriew hapoh ka jylla.
Ka kyrwoh khubor na u Bah Mawlot kala ong ruh ba ka seng ka pynpaw ka jingngewnguh ïa ki ‘riewrangbah kiba la mih shakhmat ban wad ïa ki lad ki lynti kumno ban leit thep ïa ki kot ki sla bad ki jingdonkam kiba ïadei bad ki kyndon ki aiñ tih dewïong kumba la thaw da ka Sorkar India bad ka Sorkar Jylla kiba don shibun ki kyndon kiba ai jingïada ïa ka mariang, ki nongtrei bad ïa ki jingthaw baim baroh.
