Tura, Nailar 30
Ha ka jingkhynra drok da ki pulit ka Anti-Narcotics Task Force (ANTF), West Garo Hills, la ïoh ban kurup 311 tylli ki tyndong ba la thep da u drok ‘Heroin’ ha ka shi taïew na kylleng ka distrik.
Katkum ka khubor ba la ïohlum na u SP ka West Garo Hills, u Abraham T Sangma, ha ka Sngi Saitjaiñ, la ong ba ki pulit ka ANTF ki la kurup 80 tylli ki tyndong ba la thep da u drok ‘Heroin’ ha ryngkat ka pisa bad ki Mobile Phone na ka thaiñ Tura, 60 tylli ki tyndong na ka thaiñ Phulbari bad sa 171 tylli ki tyndong na ka thaiñ Rongram ha kane ka shi taïew.
“Ki pulit ka ANTF, West Garo Hills ki la pynlong ïa ka jingkhynra ban ïoh kurup drok ha ka distrik baroh kawei. Ha kane ka jingkhynra, la ïoh ban kurup ïa u drok bad la kem ruh ïa ki katto katne ngut ki nongdie drok na ki bynta bapher-bapher jong ka distrik,” la ong u SP ha u kyrwoh khubor da kaba bynrap ba kane ka jingkhynra ka ïarap ban teh lakam ïa ka jingkhaïi drok ha ka thaiñ.
U Abraham u la ong ba ki pulit ka West Garo Hills ki long kiba la khreh ban pynthikna ïa ka jinglong shngaiñ jong ki nongshong shnong bad kin bteng ban leh da kaba tyngeh pyrshah ïa kito kiba donkti ha ki kam be-aiñ. U la kyntu ruh ïa ki paidbah ba kin long kiba peitngor bad ba kin ai jingtip sha ki thanat lada ki ïohi ïa kino-kino ki kam kiba lah ban buh jingma.
