Jowai, Nailur 01
Wat la ka Sorkar Kmie bad ka Sorkar Jylla ki la shim ïa ki sienjam ban pynïoh surok ha baroh ki shnong nongkyndong lyngba ka skhim PMGSY, hynrei kaei kaba jia long ba ka surok Pradhan Mantri Gram Sadak Yojana (PMGSY) kaba pynïasoh ïa ka shnong Thangbuli kaba hap hapoh ka Amlarem Sub-Division, West Jaiñtia Hills District ka la shah ieh noh khlem maramot watla ka por ne ka jingkitkhlieh u kontraktor ban shna ïa ka surok kam pat kut kaba tip kum ka ‘Defect Liability Period’ (DLP).
Kane ka surok PMGSY kaba pyntrei ha u snem 2020 ka pynïasoh ïa ka shnong Jaraiñ, Thangbuli bad Umladkhur ka don ïa ka jingjngai kaba 4.39 km ha ka jinglut T.200.334 lak.
La pyntrei ïa ka da u kontrak, u Bah Lingias Dkhar bad la bei pisa da ka Ministry of Rural Development jong ka Sorkar India bad la pyntrei da ka tnad PWD (Roads) Jowai South Division cum Programme Implementation Unit (PIU) PMGSY.
Katkum ka DLP, u kontraktor ba shna ïa kane ka surok u dei ban khmih ïa ka jingjot jingpei ka surok haduh 5 snem bad ka Sorkar ka la mang kyrpang T.21.385 lak.
Kane ka jingmaramot katkum ki kyndon ka skhim ki kynthup naduh ka jingpynkhuid ïa ki sañium hadien ka aïom slap, ban maramot ïa ki jaka twa, ban pynbha ïa ki rud ka surok, ban pyndap ïa ki thliew ki syar bad ban siang rong ban jlih, ban shna ïa ki nala bad lada donkam dei ban pynbna ïa ki jaka shong paidbah kumjuh ka jingai rong ïa ki kynroh.
U Waheh Shnong Thangbuli, u Bah Disuk Tariang u la ïathuh, ba halor ka jingsniew jong kane ka surok ki la dep ban ujor da ka jingthoh sha u Executive Engineer jong ka tnad PWD, South Jowai Division naduh u snem 2022-2023 bad u la kular ruh ban bthah ïa u kontraktor ban maramot ïa kane ka surok.
Hynrei u la bynrap ba kaba sngewsih ka long ba u kontraktor u la wan ban maramot malu-mala ïa kane ka surok, kata ruh hashuwa ban pynlong ïa ka Jingïaseng jong ka War Jaiñtia Presbytery bad hadien ka Jingïaseng Presbytery u la iehnoh khlem maramot haduh kine ki sngi.
“Ngi pynrem jur ïa une u kontraktor bad lada ki bor ba dei khmih kim maramot ïa kane surok hapoh u bnai Nailur, ka dorbar shnong kam banse ban ïaid shakhmat namar ba kane ka surok ka kylla long maw jynthut ïa ka leit ka wan, ka kit ka bah bad ka pang ka shitom ïa ki paidbah nongshong shnong kiba pyndonkam ïa kane ka surok”, la ong u Bah Tariang.
Ban don bynta lang ha ka khia ka shon jong ki nongshong shnong, u General Secretary Synjuk Waheh shnong Ri-Jaiñtia bad General Secretary Synjuk Waheh Shnong, Amlarem bad uba dei ruh u Waheh Shnong ka Amlarem, u Bah Kampher Pohlong u la ong katkum ka jingmang jong kane ka surok dei ban maramot hapoh 5 snem lada don kano-kano ka jingdawa hynrei lada peit ïa ka jinglong-jingman jong kane ka surok marsyn dep shna tang hadien katto-katne bnai ka surok ka la sniew bad jot rathai.
U Bah Pohlong u la kyntu ïa ka tnad PWD South Jowai Division naduh ki EE kumjuh ki ‘Overseer’ ba kin wan jurip da lade ïa ka jinglong-jingman jong kane ka surok khnang ba kum kine ki kontraktor nangne shakhmat dei ban da phikir shuwa ban mang ïa kino-kino ki ‘Work Order’.
“Kum kine ki jait skhim kham ñiar ban ïoh man la ka por bad katkum ka ‘Work Order’ ba hapoh 5 snem lada don kano-kano ka jingdawa dei ban maramot shisien lane arsien shisnem hynrei ha kaba ïadei bad kane ka surok naduh ba la dep pyntrei ym don kano-kano ka jingmaramot hynrei la shu wan buh tang ïa ki maw ki shyiap ban pynthame ïa ki paidbah nongshong shnong”, la ong u Bah Kampher Pohlong.
