Shillong, Nailur 01
Ki BSF bad ki pulit ka jylla ki la ïoh ban kem ïa uwei u nong Bang-ladesh ïa uba la kynnoh ba u ju pynrung briew be-aiñ na Bangladesh sha India.
Ha u kyrwoh khubor ba la phah ha ka Sngi U Blei, ki BSF ki la ong ba ha ka Sngi Saitjaiñ, ki BSF bad ki pulit ka jylla ki la kem ïa utei u briew na kawei ka jaka kaba hap ha East Khasi Hills bad kaba don hajan khappud. Ïa une u briew uba la shah kem la tip kyrteng kum u Mohammed Mijan Mia, 49 snem ka rta, na Sunamganj District jong ka Bangladesh.
Ki BSF ki la ong ba ka jingkem ïa u Mijan Mia ka dei hadien ba ki la ïoh ïa ka khubor kaba thikna bad la kem ïa u na kawei ka jaka ba long khlaw.
Ha ka jingtohkit, ki BSF ki la ong ba u Mijan Mia u la phla ba u la trei kum u briew uba ju pynrung be-aiñ ïa ki nong Bangladesh sha India. Ym tang katta, la ong ba u ju don bynta ruh ha ki kam khaïi mar be-aiñ.
Na ka liang ki BSF ki la aiti noh ïa u Mijan Mia sha ki pulit ka Dangar, East Khasi Hills, ba kin bteng ïa ka jingtohkit bad ban pyndep ïa ki kam kiba sah katkum ka aiñ.
