New Delhi, Nailur 01
Ka President ka Ri, ka Droupadi Murmu, ka la pynpaw ïa ka jing-sngewkhia halor ka jingbym don ka jingkyrshan na ka imlang-sahlang ïa ki kynthei kiba la lait im na ki kam runar ba thmu pyrshah ïa ki.
Kane ka jingkren jong ka President ka long hapdeng ka jingbitar ha kylleng ka ri halor ki kam runar pyrshah ïa ki kynthei. Ka jingshah leh be-ijot bad shah pynïap jong ka doktor ha kawei ka Hospital ha Kolkata, bad bun tylli ki mukotduma jong ka jingshah lehbeiñ bad shah leh be-ijot ba la mudui pyrshah ïa ki aktor ba pawnam ha ka kam shna phlim Malayalam, ki la pynmih ïa ki jingkhot ban bishar bniah biang ïa ka rukom leh ka India ïa ki kynthei bad ki khynnah.
“Ka long ka bynta kaba sngewsih ha ka im-lang sahlang jong ngi ba wat hadien ba ki la leh ïa ka kam runar, ki nongleh kam sniew ki ïaid khlem jingtieng. Kito kiba ngat ha ki kam runar jong ki, ki im ha ka jingtieng kumba ka jingpyrkhat jong ki hi ka la leh bun ki kam runar. Ka jinglong jong ki kynthei kiba shah lehbeiñ ka kham jynjar shuh-shuh namar ba wat ki briew ha ka imlang sahlang kim kyrshan ïa ki,” la ong ka President Murmu ha ka jingkren pynkut jong ka ha ka National Conference of the District Judiciary ban rakhe ïa ka jingdap 75 snem jong ka Supreme Court.
Ka la ong ba baroh ki nongshim bynta ki dei ban ïatreilang ban weng ïa ki jingeh kiba bun kiba ka tnad bishar ka ïakynduh.
“Nga sngewkmen ban ïohi ba ka jingdon jong ki kynthei ha ki komiti jied ka la nang kiew ha kine ki snem. Kane ka jingkiew ka la wanrah ïa ka jingkiew kaba 50 percent ha ka jingdon ki kynthei ha ki komiti jied (Selection Committee),” la ong u President Murmu.
Ka Supreme Court ka la pynlong ïa ka National Conference jong ka District Judiciary kaba ar sngi ha ka Sngi Saitjaiñ bad Sngi U Blei bad ki la don palat 800 ngut ki nongïashim bynta na ki ïingbishar District na baroh ki jylla bad ki Union Territory.
Ka President bad u Myntri ka tnat aiñ jong ka Sorkar Pdeng u Arjun Ram Meghwal ki la khot ban wad ïa ka lad ban weng ïa ka jing pynslem ïa ki mukotduma ha ki ïingbishar bad ban pynjah ïa ka jingsngewthuh ïa ka kolshor “tarikh par tarikh” (tarik shi tarik).
U Chief Justice jong ka Ri India u DY Chandrachud u la ong ba ki la buh da ka saiñdur treikam na ka bynta ban pynduna ïa ka jingsahkut jong ki mukotduma.
Ha kane ka jingïalang la ïashim bynta da ki nongbishar jong ka Supreme Court, nongbishar ba hakhlieh jong ki High Court, Secretary General jong ka Supreme Court, ha ryngkat ki Registrar General jong ki High Court.
