Shillong, Nailur 01
Ki pulit ka Dimapur, Nagaland, ki la kem ïa lai ngut ki briew ha ka Sngi Saitjaiñ halor ka jingkynnoh ba ki la donkti ban lute na kawei ka ‘Petrol Pump’ kaba don ha Umran Dairy, Ri-Bhoi ha ka 25 tarik Nailar.
Katkum ka khubor ba la pynmih da ka kotkhubor “Eastern Mirror” mynta ka sngi, la ong ba kitei kiba la shah kem ki dei kiba la tip kyrteng kum u Bashen Lam, 33 snem ka rta, Bokavi Zhimomi, 25 snem ka rta bad sa uwei pat uba dang hapdeng 17-18 snem ka rta. Kine baroh lai ngut ki la shah kem na Dimapur, la bynrap kane ka kotkhubor.
Kitei ki lai ngut ki la shah kynnoh ba ki la lute T. 4 lak na katei ka ‘Petrol Pump’ bad hadien ba ki la dep ban lute, ki la phet krad da kawei ka kali Bolero. Na ka liang ki pulit ka Dimapur ki la ïoh bat ïa kane ka kali Bolero kaba don ïa u nombor NL 07 CB 0156.
Ïa kitei ki lai ngut ryngkat bad ka kali ba la kurup yn sa wanlam sha Meghalaya ha kaba ki pulit ka Ri-Bhoi kin sa bteng ban pynlong ïa ka jingtohkit.
