Shillong, Nailur 01
U Bah Donkupar Sumer uba dei u nongkitkam ka National People’s Party (NPP) na Umsning Constituency u la pynpaw ïa ka jingsngewkmen hadien ba u MLA ka Congress, u Dr. Celestine Lyngdoh, u la wanrung sha ka seng NPP ban pynkhlaiñ ïa ka seng ha Umsning bad ïa ka Ri-Bhoi District baroh kawei.
“Nga kum u nongtrei ka seng NPP nga pdiang beit khamtam haba wan u MLA na ka bynta ban pynkhlaiñ ïa ka seng,” u la ong.
U Bah Donkupar um pat kwah ban ong eiei halor ka ilekshon MDC namar haduh mynta ka sorkar kam pat kren shai la kan pynlong ïa ka ilekshon, hynrei u kyrmen ba ka seng NPP kan ai tiket beit ïa ka Kong Macdalyne Mawlong kaba la dei lypa ka MDC.
“Ngan ym pan tiket shuh ïa ka ilekshon MDC na ka seng NPP namar la don lypa ka MDC ba mynta ka Kong Macdalyne. Hynrei ngan kyrshan beit ïa ka kyrtong ba ka seng kan pynïeng na Umsning constituency,” la ong u Bah Donkupar.
U la pyntip ba katkum ka jingïathuh ki nongkitkam ka NPP Ri-Bhoi kin sa pdiang burom ïa u Dr. Celestine ban rung sha ka NPP Umsning Block bad ïa u Bah Charles Marngar u MLA ka Mawhati Constituency sha Mawhati.
U la ïathuh ba u Dr. Celestine watla u dei u MLA, hynrei un sa rung dkhot pura ruh sha ka NPP Umsning bad hangta yn sa ïohi ïa ki nongkitkam jong u ki ban sa mih noh na ka Congress.
Shuh shuh u Bah Donkupar u la pyntip ba da ka jingïatreilang bad u MLA, u don jingkyrmen ba ïa ka ilekshon MDC ka NPP kan ïoh rah da kaba suk ha Umsning Constituency.
Kum ban shu pynkynmaw u Bah Donkupar Sumer u dei u MDC barim ka Umsning Constituency, hynrei u la rung sha ka seng NPP hashwa ka ilekshon MLA ha u snem 2023 hadien ba u khlem ïoh tiket na ka UDP.
