Shillong Nailur 01
U MLA ka Congress na Mylliem konstitwensi u Bah Ronnie V Lyngdoh u la ong ba ma u kum u MLA ba marwei ka seng u ai ka jingïatreilang bad ka All India Trinamool Congress (AITC) da kaba kyrshan markylliang ban ïoh ia ka kyrdan nongïalam ka Liang Pyrshah ha Ïingdorbar Thawaiñ ka Jylla.
U Lamphang ka Ïingdorbar Thawaiñ u Thomas A Sangma u la thung ïa u MLA ka AITC u Dr Mukul Sangma kum u nongïalam ka Liang Pyrshah, katba u Bah Ronnie u la ïoh ban bat ïa ka kyrdan Opposition Chief Whip lyngba ka jingsynrop lang hapdeng ka AITC bad ka Congress.
Da kaba synrop lang ka AITC bad ka Congress, ka AITC ka la lah ban ïoh ïa ka kyrdan nongïalam ka Liang Pyrshah namar ki don 6 ngut ki MLA kaba pynbiang katkum ki kyndon, kata ka long ban don 6 ngut ki MLA ban ïoh jingithuh kum ka Liang Pyrshah kaba ïoh ban bat ïa ka kyrdan nongïalam ka Liang Pyrshah.
U Bah Ronnie u la ong ba na ka liang ka AITC bad ka Congress ki la wanlang ban kyrshan markylliang ha kaba ka Congress ka kyrshan ban thung ïa u Dr Mukul kum u nongïalam ka Liang Pyrshah katba ka AITC ka kyrshan ban thung ïa u kum u Opposition Chief Whip.
Haba kylli la kine ki ar tylli ki seng ki thaw ïa kano kano ka kynhun ban ïatreilang kum ka Liang Pyrshah ha Ïingdorbar Thawaiñ, u Bah Ronnie u la ong ba ym don kano kano ka jingthaw ïa ka kynhun synrop hynrei ka dei kaba shu wanlang baroh ar tylli ki seng Liang Pyrshah ban kyrshan markylliang.
“Ngi phah da ka jingthoh sha u Lamphang ba ngi kyrshan markylliang ban bat ïa ka kyrdan nongïalam ka Liang Pyrshah bad Opposition Chief Whip,” la ong u Bah Ronnie.
Na ka liang u Dr Mukul u la ong ba ka rai jong u paidbah ka long ban don ha ka Liang Pyrshah bad ka dei ka rukom ba ki seng kiba don ha Liang Pyrshah kin wan ban ïadonlang bad ban rah ïa ki mat kiba donkam na ka bynta ka jingmyntoi ki paidbah ka Jylla.
Ban ïoh jingithuh kum ka Liang Pyrshah ha Ïingdorbar Thawaiñ ka Jylla kaba biang nombar ban bat ïa ka kyrdan nongïalam ka Liang Pyrshah, donkam ban don 6 ngut ki MLA tang jong kawei ka seng lane da ka kynhun synrop na ka jingdon ki 60 ngut ki MLA kaba mut ba donkam ban don one-tenth na ka jingdon ki dkhot baroh.
