Shillong Nailur 01
Ka Ïingdorbar Thawaiñ ka Jylla ka la mynjur ïa ki katto katne ki jingpynkylla hapoh ka aiñ kaba dei ban pynrung kyrteng ïa ki nongtrei bylla kiba wan nabar Jylla ha kaba kito kiba pynkheiñ ïa ki kyndon jong kane ka aiñ kin ngat ha ka kuna kaba kot haduh T.1 lak.
Kane ka jingpynkiew ïa ka kuna ka dei kaba lyngba ka jingmyn -jur ka Ïingdorbar Thawaiñ ïa ka aiñ rew ha ka dorbar synrai kaba dang shu lut shen bad kane ka aiñ ka kyrteng ka Meghalaya Identification Registration (Safety and Security) of Migrant Workers (Amendment) Bill, 2024.
Ha kane ka aiñ, la kdew ba ka jingdaiñ kuna ïa kiba pynkheiñ ïa ki kyndon ka dei naduh T.5,000 haduh T.1 lak, bad kito kiba pynkheiñ ha ka sien kaba bud, kin mad ïa ka jingshah set patok kumba 3 bnai.
Ka jingkitkhlieh ban daiñ kuna ka dei ka jong ki ophisar kiba pynrung kyrteng ïa ki nongtrei bylla lada don kiba khlem bud ïa ki kyndon jong kane ka aiñ.
Kum ban pynkynmaw, ki la don bun bah ki nongtrei bylla kiba la wanrah nabar Jylla bad ki don kiba khlem pynrung kyrteng hapoh jong kane ka aiñ namar kito kiba pyntrei ïa ki, ki khlem shimkhia ban pynrung kyrteng katkum ka aiñ.
